Këshilli Kombëtar i PD, Noka: Ditë historike për demokratët, ditë e zezë për Edi Ramën!

Pas mbledhjes së Këshillit Kombëtar të Partisë Demokratike ku u miratuan ndryshimet në Statut, Sekretari i Përgjithshëm i PD-së, Flamur Noka tha se kjo është një ditë historike për demokratët dhe një ditë e zezë për Ramën.

“Sot për PD-në është një ditë e veçantë, është një ditë historike për demokratët në të gjithë Shqipërinë.

Sot është një ditë e zezë për Edi Ramën dhe regjimin e tij. Skenari i tij për të mbajtur të përçarë këtë parti dhe për të mbajtur demokratët në luftë me njëri tjetrin, sot mori fund.

Sot Këshilli Kombëtar i PD-së, në lartësinë e detyrës që i kanë ngarkuar demokratët, në lartësinë e detyrës që ka një institucion politik kryesor i një force politike, arriti të përkthejë më së miri, kërkesën e demokratëve dhe të përkthejë më së miri, një nga mesazhet kryesore të protestës së 20 shkurtit,” tha Flamur Noka duke vlerësuar se bashkimi është gjithçka për demokratët dhe pas këtij vendimi për të bashkuar dhe unifikuar demokratët nga qendra në bazë ne jemi në një etapë të re.

“Tashmë të gjithë të bashkuar do të vërshojmë cep më cep të Shqipërisë, për të justifikuar këtë besim te demokratëve dhe për ti shkurtuar regjimit më kriminal dhe korruptim, ditët.

Pas këtij bashkimi të opozitës kemi një mision historik përpara, të rikthehet vota e lirë.

Prej 10 vitesh shqiptarët nuk votojnë të lirë, prej 10 vitesh regjimi kriminal dhe korruptiv i Edi Ramës, blen dhe vjedh votën. Ky është një mision historik i yni,” tha Sekretari i Përgjithshëm i Partisë Demokratike, Flamur Noka, duke përfunduar:

“Që të rikthehet vota e lirë, do të duhet se sbën një qeveri teknike. Kjo do të jetë motoja e betejës dhe aksionit tonë.

Shqipëria duhet të çlirohet nga kjo zgjedhë barbare dhe Shqipërisë duhet ti rikthehet edhe vota dhe liria.”

Pyetje: A mund te këtë transparencë për votimin në kryesi sot?

Flamur Noka: Kryesia nuk voton, miratoi në mënyrë unanime draftin që paraqitëm dhe ja paraqitëm Këshillit Kombëtar. Këshilli pati vetëm 6 vota kundër dhe votoi pothuajse në mënyrë unanime këtë proces shkrirje të brendshme, bashkimi aq shumë të pritur.

Pyetje: Duke qenë se folët për qeveri teknike, a e ka PD emrin e kryeministrit për këtë qeveri?

Flamur Noka: Në traditën e PD-së dhe të demokracisë shqiptare, kryeministër bëhet ai që merr shumicën e votave. Ne sot nuk jemi më forcë e dytë, por jemi forca e parë politike dhe do ti mëshojmë shumë faktit, që pa qeveri teknike Shqipëria nuk mund të shkojë në zgjedhje. Këtë nuk kemi detyrë, por e kemi mision dhe do ta realizojmë.

Pyetje: Basha është akuzuar për eliminimin e votës brenda PD-së, si ju duket votimi i pamundësuar për Bardhin dhe anëtar e tjerë të kryesisë. A është ky një eliminim vote, apo sulm ndaj votës së lirë në PD.

Flamur Noka: I gjithë procesi ka shkuar sipas statutit të PD. Neni 9, pika 2 i statutit të PD thotë që; në PD demokracia ushtrohet ose në mënyrë direkte me votën e anëtarësisë, ose më përfaqësuesit e tyre. Në Këshillin Kombëtar janë përfaqësuesit e demokratëve që ushtrojnë votën dhe vullnetin e demokratëve. Ishte vota ajo që prevaloi dhe vendosi këtë bashkim.

Ndryshe, sot me ndryshimet në Statutin e PD, të cila u miratuan në Kryesinë dhe Këshillin Kombëtar të Partisë Demokratike, Kryetari i Grupit Parlamentar dhe Nënkryetari i Parlamentit, automatikisht do të jenë Nënkryetarë të PD, përkatësisht Gazment Bardhi dhe Agron Gjekmarkaj.

Në nenin 47 te statutit të PDSH, pas pikës 2 shtohet pika 3 me përmbajtje si vijon:

Në rast se pas përcaktimit të përbërjes së Kryesisë së PDSH, sipas pikës 1 të nenit 47, deputetë anëtarë të Kryesisë së Grupit Parlamentar të PDSH, nuk rezultojnë anëtarë të saj, këta te fundit kooptohet me vendin Kryesie, si anëtarë të saj me të drejta të plota, deri në përfundimin e mandatit parlamentar, ose zgjedhjen e tyre sipas pikës 1 të nenit 47. Ndërkohë, në nenin 51 të statutit të PDSH, pas pikës 2 shtohet pika 3 me përmbajtje si vijon.

Në rast se pas zgjedhjes së nënkryetarëve, sipas parashikimeve të nenit 45 rezulton se kryetari i grupit parlamentar të PD-së dhe sipas rastit Nënkryetari/Kryetari i Kuvendit të Shqipërisë nuk janë fitues sipas kësaj procedure, atëherë ata automatikisht konsiderohen nënkryetarë të partisë për shkak të funksionit. Përgjatë këtij mandati secili prej tyre gëzon dhe ushtron të njëjtat të drejta dhe përgjegjësi si nënkryetarët e zgjedhur, për aq kohë sa gëzon funksionin e drejtuesit të grupit parlamentar të PD dhe/ ose atë të Nënkryetarit/Kryetarit të Kuvendit të Shqipërisë.