Kina nuk është më partneri tregtar kryesor i Gjermanisë

Shtetet e Bashkuara në tremujorin e parë të këtij viti kanë tejkaluar Kinën në shkëmbimin tregtar me Gjermaninë, duke u pozicionuar si partneri tregtar kryesor.

Bazuar në të dhënat zyrtare të Destatis, Agjencia e lajmeve Reuters raporton se vlera e shkëmbimit tregtar amerikano-gjerman për periudhën janar-mars 2024 ka arritur 63 miliardë euro deri sa shkëmbimi kinezo-gjerman ka arritë më pak se 60 miliardë euro.

Në vitin 2023 Kina ishte për të tetin vit me radhë partneri tregtar më i madh i Gjermanisë, me vlerë këmbimi prej 253 miliardë euro derisa këmbimi gjermano-amerikan ishte për disa qindra miliona euro më pak.

“Eksporti gjerman në SHBA sërish u rrit në këtë tremujor duke ju falënderuar forcimit të ekonomisë amerikane, deri sa eksporti në Kinë u ul, ashtu si edhe importi,” tha Vincent Stamer nga Commerzbank, duke sqaruar ndryshimin në krye të këtij partneriteti tregtar me Gjermaninë për periudhën e parë të këtij viti.

Vitin e kaluar Gjermania tha se dëshiron të ul ekspozimin ndaj Kinës, duke ju referuar ndryshimeve politike dhe duke akuzuar Pekinin për dokumentin strategjik për “praktikë të pandershme”. Por, Berlini nuk saktësoi se çfarë masa politike do të ndërmerr në mënyrë që të zbus varësinë, thekson Reuters.

Importi gjerman i mallit kinez ra në tremujorin e parë gati 12 për qind, ndërsa eksporti u ul pak më shumë se 1 për qind, tha Juergen Matthes nga Instituti Ekonomik IW.

Eksperti i IW vlerëson se shkaqet mund të kërkohen tek “rënia e ekonomisë kineze më shumë se sa që ka shpresuar shumica, dhe ekonomisë amerikane që sot është shumë më mirë se sa është parashikuar”.

Aktualisht, rreth 10 për qind e eksportit gjerman shkon në SHBA ndërsa në Kinë nën 6 për qind, vlerëson eksperti pranë Institutit Ekonomik IW, Juergen Matthes.