Koalicioni “Forumi Shqiptar” fiton zgjedhjet në Tuz

Koalicioni “Forumi Shqiptar – Bashkim dhe Zhvillim”, i drejtuar nga Nik Gjeloshaj, ka fituar shumicën absolute në zgjedhjet në Tuz, komunë kjo e banuar me shumicë shqiptare në afërsi të Podgoricës, të cilat u mbajtën dje me 5 mars. Sipas të dhënave paraprake, ky koalicion ka marrë rreth 52 për qind të votave.

Në këtë koalicion, veç partisë së Gjeloshit – Alternativa Shqiptare, AA, bëjnë pjesë edhe partitë tjera shqiptare: Aleanca Demokratike e Shqiptarëve, DSH, Unioni Kombëtar Shqiptar, UKSH, dhe Aleanca Demokratike e Malit të Zi, DSCG.

Koalicioni “Rrugës së drejtë” – Partia Demokratike e Socialistëve, DPS, Unioni Demokratik i Shqiptarëve, UDSH, Partia Boshnjake, BS, dhe Social Demokratët, SD, fitoi 33 për qind të votave.

Në garë ishin edhe dy koalicione të tjera, sikurse koalicioni shqiptar “Bashkë” – Partia Demokratike, PD, dhe Forca, dhe koalicioni “Me gjithë zemër për Tuzin” – Partia Socialdemokrate, SDP, dhe Lëvizja për Tuzin. Si dhe, tri subjekte politike: “Më të fortë jemi së bashku” – Demokratët, “Për Tuzin me nderë” – Partia Popullore Socialiste, SNP, dhe “Për gjeneratat e ardhshme” – Partia për Drejtësi dhe Pajtim, SPP.

Të drejtë vote në këto zgjedhje kishin 12.387 votues, ku 66.5 për qind nga ta morën pjesë në votime.

Dita e zgjedhjeve ishte e qetë, me parregullsi të vogla që nuk mund të ndikojnë në rezultatin e zgjedhjeve.

Tuzi është në qendër të Malsisë, që gjendet mes Malit të Zi dhe Shqipëri.

Statusin si komunë e pavarur , Tuzi e rifitoi në shtator të vitit 2018, duke u ndarë nga kryeqyteti i Malit të Zi.

Dekada më parë, Tuzi ishte pjesë administrative e Podgoricës dhe më pas një prej komunave të kryeqytetit.

Në zgjedhjet e para të mbajtura më 2019, Partia Demokratike e Socialistëve, DPS, e presidentit Millo Gjukanoviç fitoi pushtetin në Tuz.