Këshilli Kombëtar i PD: Në zgjedhje me koalicion! Sot pritet regjistrimi në KQZ

Përkundër vendimit të Edi Ramës që me Gjykatën e Apelit të rikthen për gjykim në Shkallën e Parë vendimet e miratuara të Kuvendit të 11 Dhjetorit, Këshilli Kombëtar i i Partisë i Partisë Demokratike vendosi të garojë në zgjedhjet lokale të 14 majit në koalicion ndërsa u miratua dhe një Deklaratë me 6 pika thuhet se është vetëm një PD dhe se kjo forcë politike do të futet në zgjedhje, ndërsa u bëhet thirrje demokratëve që të mbështesin kandidatët e zgjedhur përmes Primareve.

“Ne do paraqesim në KQZ kërkesën për regjistrimin e PD në zgjedhje sepse kjo bazohet ne faktin se nuk është në fuqi vendimi gjykatës dhe ata sipas kodit zgjedhor nuk mund te regjistrohen. “Brava” ka dhënë dorëheqjen dhe e ka mbajtur peng Rama, dhe ai do të shkojë në gjykatë dhe do të pranojë që ka dhënë dorëheqjen. Ai cakton Alibejan si kryetar, por kjo s’ka bazë ligjore.

Qëllimi me madhor ishte bashkimi. Basha ishte peng. Edhe sot mund ti çohet dosja nga e para për larje parash.Nga 720 mije dollare vetem 25 mije dollare kane hyre në arkë të PD-së. Ne s’mund të gjejmë burimin por ai transaksion nuk është bërë legal nga arka dhe kontot bankare të PD. Auditi ka dorezuar raportin para 2-3 ditesh,” tha Kryetari i PD, Sali Berisha, para Këshillit Kombëtar të PD ndërsa Kryetari i Këshillit, Edi Paloka, sqaroi:

“Gjatë gjithë mbledhjes, nuk pati asnjë ide apo propozim të mos hyjmë në zgjedhje. PD do të hyjë në zgjedhje me bindje që do të fitojë. Kjo ishte pika e parë, pika e dytë që u diskutua ishte se si do të hyjmë në zgjedhje. Pati ide për koalicion dhe kandidatë të pavarur. Këshilli vendosi që do të hyjmë me koalicion. U miratua dhe një rezolutë e përqendruar në Këshillin Kombëtar.

Ka një PD të bazuar në Këshillin e Anëtarësisë. Kjo parti do të hyjë në zgjedhje për t’i fituar ato. Janë disa parti me të cilat kemi marrëveshje. Janë teknikalitete që do të zgjidhen dhe nga kryesia. PL, Partia e të Drejtave të Njeriut dhe parti të tjera. Emri i koalicionit akoma nuk është vendosur. Do të ndjekim të gjitha afatet, i pari është nesër. Që nesër ne do të ndjekim të gjitha rregullat dhe do të regjistrojmë koalicionin tone,” tha mbrëmë Edi Paloka me të kryer mbledhja e Këshillit Kombëtar të PD.

Ndryshe, Këshilli Kombëtar i Partisë Demokratike nga mbledhjea e mbrëmjes së të dielës doli me një Deklaratë me 6 pika, dhe teksa i bëhet thirrje të gjithë demokratëve të mbështesin kandidatët e Partisë Demokratike theksohet se Partia Demokratike dënon Lulzim Bashën dhe Enkelejd Alibeajn, si pengje të Edi Ramës, që ishin instrumenta të tij, në vendimin e tij antikushtetues.

Deklaratë

Këshilli Kombëtar i Partisë Demokratike, në mbledhjen e tij të datës 5 mars 2023, analizoi gjerësisht gjëndjen politike në vend në tërësi, dhe veçanërisht vazhdimin e skenarit armiqësor ndaj Partisë Demokratike nga Edi Rama dhe shteti i tij monist. Këshilli Kombëtar i Partisë Demokratike deklaron se:

1.   Partia Demokratike është vetëm një! Ajo është parti e anëtarëve të saj! Ajo është parti e njerëzve të lirë dhe asgjë nuk na ndal ne në misionin tonë për të shpëtuar Shqipërinë!  

2.   Vendimi gjyqësor i Edi Ramës për të përjashtuar Partinë Demokratike nga zgjedhjet konfirmon tmerrin e tij nga opozita e vërtetë dhe planin e tij për të zhbërë opozitën, konsolidimin e monizmit të bazuar në vjedhjen, drogën, krimin. Ky plan ka dështuar dhe sot Partia Demokratike është më e fortë se kurrë!

3.   Partia Demokratike dënon gjithashtu Lulzim Bashën dhe Enkelejd Alibeajn, pengje të Edi Ramës, që ishin instrumenta të tij, në vendimin e tij antikushtetues.

Partia Demokratike në betejën e saj me monizmin, është sot forcë politike më e fuqishme, më e përgatitur se kurrë  për të hyrë në zgjedhje dhe për t`i fituar ato. Ne jemi të bindur se në këtë mënyrë, ne përfaqësojmë aspiratat dhe ëndrrat e shqiptarëve që duan ta shohin Shqipërinë si e gjithë Evropa!

4.   Ne u bëjmë thirrje të gjithë demokratëve të mbështesin kandidatët e Partisë Demokratike të cilët janë votuar nga anëtarësia, në procesin më transparent dhe më fisnik, më të civilizuar që ka njohur Shqipëria. Kështu u shërbejmë interesave të Shqipërisë dhe shqiptarëve!  

5.   I bëjmë thirrje shqiptarëve të mbështesin kandidatët e Partisë Demokratike si e vetmja mundësi për  të ndryshuar Shqipërinë!

6.   Partia Demokratike fton demokratet dhe demokratët, mbështetësit tanë të vazhdojmë revolucionin tonë paqësor demokratik gjer në shpëtimin e Shqipërisë nga monizmi i Edi Ramës!

Ndërkohë me t’u kryer mbledhja e Këshillit Kombëtar të PD, dy përfaqësuesit ligjor depozituan në KQZ dokumentacionin për regjistrimin e Partisë Demokratike në zgjedhjet e 14 Majit.