Komision Hetimor për DSIK/ Pranohet kërkesa e opozitës, Balla: Dakord, por…

Konferenca e Kryetarëve ka pranuar në parim ngritjen e Komisionit Hetimor Parlamentar për DSIK, pas kërkesës së PD-së dhe LSI-së, për të hetuar mënyrën se si u pajis me ccertifikatën e sigurisë, i zgjedhuri i Kryeministrit Rama për ministër të Jashtëm, Gent Cakaj.

 “Jemi dakord në parim me çdo kërkesë që vjen nga opozita, por vendimi të jetë në koherencë me ligjin për komisione hetimore, vendimet përkatëse të gjykatës kushtetuese dhe legjislacionin rregulltator për informacionin e klasifikuar,” ka thënë kryetari i grupit parlamentar të PS-së, Taulant Balla.

Kujtojmë se edhe vetë kreu i PD-së, Lulzim Basha pas mosdekterimit nga ana e Metës për Gent Cakajn, tha se “ne kemi nisur punën për të hetuar në të gjitha format e mënyrat duke përfshirë dhe hetimin parlamentar, përgjegjësitë e DSIK-së, zv/ministrit Caka, ministrit Bushati, kryeministrit Rama dhe Shërbimit Informativ të Shtetit në dhunimin e ligjit për informacionin e klasifikuar sekret në Republikën e Shqipërisë dhe pasojat që kjo ka për sigurinë kombëtare dhe sigurinë e NATO-s”.

Çfare tha DSIK

Në një njoftim zyrtar, DSIK ka sqaruar situatën që sipas saj është e vërteta e të gjithë debatit të hapur nga momenti i parë.

“DSIK administron përgjigjet zyrtare të Autoriteteve Verifikuese brenda vendit; SHISH, SHÇBA, si dhe të Agjencisë së Kosovës për Inteligjencë, AKI, si i vetmi Autoritet Verifikues i Republikës Kosovës, (pasi z. Cakaj mban edhe shtetësinë e Kosovës, krahas shtetësisë shqiptare)”, thuhej më tej në njoftimin e DSIK.

Ndërsa në fund deklarohet se: DSIK administron dokumentacion të plotë lidhur me procedurat e ndjekura dhe informacionin e përftuar në funksion të verifikimit të sigurisë dhe të pajisjes me CSP të z. Gent CAKAJ.

Kërkesa e Opozitës 

Opozita dorëzoi në Kuvend kërkesën për ngritjen e një komisioni hetimor për të verifikuar nëse DSIK e ka zbatuar ligjin për pajisjen e zëvendësministrit të Jashtëm Gent Cakaj me ccertifikatën e sigurisë dhe si është zbatuar ligji për administrimin dhe përpunimin e informacioneve pa qenë i pajisur më parë me këtë dokument.

Në kërkesën e opozitës janë 4 çështje që janë objekt i hetimit parlamentar:

1. Verifikimi i ligjshmërisë dhe efekteve të veprimeve të institucioneve shtetërore në pajisjen e z. Gent Cakaj me “ccertifikatë sigurie” nga DSIK;

2. Roli i Këshillit të Ministrave, Kryeministrit apo ministrave përgjegjës në shkeljen e procedurave dhe rregullave për garantimin e informacionit “sekret shtetërore” dhe shkeljen e procedurave për pajisjen e z. Cakaj me “certifikatë sigurie”;

3. Arsyet e moszbatimit të ligjit nga z. Gent Cakaj për mbi 7 muaj dhe pasojat që ka sjellë për sigurinë kombëtare dhe angazhimet e Shqipërisë si vend anëtar i NATO-s dhe vend kandidat për në BE;

4. Autoritetet përgjegjëse që kanë lejuar z. Cakaj, të administrojë dhe përpunojë informacion të klasifikuar, pa qenë më parë i pajisur me “certifikatë sigurie”.

Kërkesa e opozitës për komision hetimor merr shkas nga informacionet zyrtare të paraqitura në dekretin e Presidentit Ilir Meta për refuzimin e dekretimit të Gent Cakajt si ministër i Jashtëm.

Në dokument thuhej se: “DSIK e ka pajisur Genti Cakajn me një ccertifikatë sigurie 5 vjeccare brenda 24 orësh në kundërshtim me ligjin, i cili detyron që procedura për certifikatën brenda ditësh ka afat vetëm 1 mujor. DSIK nuk ka verifikuar Genti Cakajn në vendet ku ai ka jetuar gjatë, sin ë Belgjikë dhe Hungari. Genti Cakaj ka refuzuar për 7 muaj të kërkojë certifikatë sigurie, si person që trajton informacion të klasifikuar si sekret shtetëror nga NATO dhe BE, pavarësisht se strukturat e Ministrisë së Jashtme e kanë vënë në dijeni me shkresë zyrtare. Neglizhenca e zëvendësministrit të Jashtëm duke refuzuar të pajiset me certifikatë sigurie prej 7 muajsh ka ccuar nëzbatimin e akteve ligjore dhe nënligjore të sipërcituara, që sipas parashikimeve të ligjit përbëjnë shkelje penale dhe janë të dënueshme sipas legjislacionit në fuqi”.

Në kërkesën e saj, opozita thekson se këto konstatime evidentojnë një situatë të rrezikshme për sigurinë kombëtare dhe ngrenë dyshime serioze mbi cenimin e detyrimeve që vendi ynë ka si vend anëtar i NATOS.

“Në këto kushte, është ne detyrimin e Kuvendit të Shqipërisë që të ushtrojë kontroll parlamentar dhe eventualisht të individualizojë përgjegjësitë e institucioneve shtetërore në këtë çështje”, thuhet në kërkesë.

Opozita, raporton “Panorama” kërkon që komisioni të ketë 9 anëtarë, ku kryetari të jetë nga PD, si dhe një afat kohor prej 3 muajsh. Sipas rregullores, Konferenca e Kryetarëve duhet të mblidhet jo më vonë se 5 ditë nga dorëzimi i kërkesës për të diskutuar kërkesën.