Komisioni i inceneratorëve për luftë të brendshme, Berisha: Kryehajn, Edvin Kristaq Rama!
Komisioni i inceneratorëve, për Ish-Presidentin Sali Berisha, po përdoret për luftë të brendshme brenda maxhorancës ndërsa kryehajn të kësaj afere e cilësoi Kryeministrin Edi Rama, i cili sipas tij, me Don Agaçion janë arkitektë të kësaj afere ndër më më kriminalet në historinë e këtij vendi.
“Ajo që po ndodh në këtë parlament është rast unik në historinë e një parlamenti. Është tragjike. Këtu përdoret në mënyrë më të papranueshme korrupsioni si mburojë. Këtu ky parlament degradon çdo ditë e më shumë. Këtu krijohen komisione në vend se të përdoren për transparencë, përdoren për luftë të brendshme brenda maxhorancës. Një ditë këta nxjerrin, nga komisioni del një javë para se të dalë nga Edvini emri, ministrat. Pas tre ditësh palët në përleshje të brendshme nxjerrin lal plehun.
Gjithçka tregon se nuk është problemi për të bërë transparencë për qytetarët, por problemi është për të bërë luftë të brendshme dhe ta përdorë korrupsionin secili si mburojë ose për çomange për të goditur tjetrin. Afera e inceneratorëve është afera më klasike e një vjedhjeje e cila ka një zinxhir hajnash, por ka për kryehajn një njeri Edvin Kristaq Ramën dhe kjo jo se unë e konsideroj atë njeriun më të rrezikshëm për vendin, apo shumë gjëra të tjera, por sepse të dashur qytetarë ai dhe Don Agaçio janë dy arkitektët e kësaj afere ndër më të turpshmet, më kriminalet në historinë e këtij vend,” tha Sali Berisha ndërsa Stela Gugallja dhe Klodian Zoto, sipas tij janë vetëm ushtarë.
“Le t’i marrim me radhë. Nis një procedurë nga ministria e Mjedisit, i cili është plotësisht fajtor dhe nuk i heq asgjë, pa pasur asnjë qindarkë në buxhet të parashikuar, por natyrisht ai kishte të gjitha garancitë se fondet do t’i jepeshin dhe fondet mund t’i jepeshin vetëm nga një person dhe ky ishte sigurisht kryeministri, Natyrisht me pëlqimin dhe përfitimin e Arben Ahmetaj, ministrit të Financave, çka nuk e bëri Shkëlqim Cani, duhet ta them, çka se nuk kam pasur ndonjë konsideratë për të. U fituan aty të paktën 13 mln euro. Këtu përmendni emrat e Gugalljas, Zotos etj, ata janë vetëm ushtarë në këtë aferë të tmerrshme e cila nuk eziston për kreun e meduzës. Kjo është shumë e qartë. Oreksi vjen duke ngrënë.”
Në fund për zellin e ish-kreut Lulzim Basha lidhur me inceneratorët shtoi.
“U krijua mekanizmi, qeveritarët përvetësuan 13 mln me djegësin e Elbasanit, tani oburra edhe më shumë se kjo funksionoi. Të njëjtën gjë bënë me djegësin e Fierit. Qytetarët e Fierit të udhëhequr nga Luan Baçi, protestuan për 3 muaj, ai ka përgëzimet më të mëdha. Nuk u shit as nuk u ble, por qëndroi në mbrojtje të interesit, çka se bëri në një orë të vetme ish-kreu i opozitës në Tiranë.”
