Komisioni i Vlerësimit, Basha: Në shtator nisim fushatën drejt fitores!

Pas Kryesisë, edhe Këshilli Kombëtar i Partisë Demokratike miratoi përbërjen e Komisionit të Vlerësimit të Kandidatëve të PD, pjesë e të cilit janë personalitete politike të PD dhe përfaqësues të shoqërisë civile e botës akademike. Sipas vendimit të Kryesisë dhe të Këshillit Kombëtar, Komisioni përbëhet nga: Bujar Nishani, Kryetar i Këshillit Kombëtar, ish President i Republikës, ish ministër Besnik Mustafaj, ish Ministër i Jashtëm, themelues i PD Genc Ruli, ish ministër, themelues i PD Enriketa Papa, pedagoge dhe historiane, studiuese e krimeve të komunizmit Mark Marku, pedagog, ish deputet.

Procesi, ku anëtarësia e Partisë Demokratike u përfshi, duke dhënë një kontribut të rëndësishëm me propozimin e një numri të madh kandidatësh, u vlerësua nga kryetari i PD, Lulzim Basha, për gjithëpërfshirjen dhe demokratizimin e mëtejshëm të funskionimit të PD.

“Emrat e propozuar nga anëtarësia përbëjnë një korpus të rëndësishëm për administrimin e qeverisjes që shqiptarët do t’i besojnë PD-së dhe aleatëve të saj në zgjedhjet e ardhshme. Përmes ketij procesi, ne kemi të identifikuar jo vetëm ata që do të përzgjidhen për kandidatë për deputetë, por edhe drejtues të qeverisjes vendore, këshillave bashkiakë dhe qeverisjes qendrore. Më të mirët e më të mirëve për të sjellë ndryshimin që presin shqiptarët, zhvillim dhe punësim,” tha Lulzim Basha në mbledhjen e Kryesisë dhe Këshillit Kombëtar të PD. Anëtarësia do ta thotë fjalën e saj përsëri në shtator, kohë kjo, kur opozita nis, de facto, fushatën elektorale për të mos u ndalur deri në fitoren e zgjedhjeve, tha Kryetari i Partisë Demokratike, Lulzim Basha duke përfunduar:

“Muaji gusht do të jetë muaj pune intensive. Krahas perzgjedhjes së kandidatëve ne do të finalizojmë programin qeverisës të vendit, do të ngremë strukturat drejtuese të fushatës elektorale dhe organizojmë partinë për zgjedhje, duke nisur nga qendra e votimit e deri tek selia qendrore në Tiranë. Në shtator nisim fushatën elektorale, e cila do të mbyllet me fitorën e zgjedhjeve dhe hapjen e nje kapitulli te qeverisjës për qytetarët dhe me qytetarët.”

Ndryshe, detyrë e Komisionit të Vlerësimit të Kandidatëve është të bëjë vlerësimin e secilit kandidat, nëse përmbush kriteret e parashikuara nga udhëzimi apo jo. Në përfundim të procesit hartohen dy lista:

1.Listën e kandidatëve që do t’i nënshtrohen procesit të konsultimit me anëtarët;

2.Listën e kandidatëve që u shtyhet aprovimi.

Kjo fazë është parashikuar të përmbyllet më 15 shtator për të vazhduar me fazën e tretë, atë të Konsultimit të listës se kandidatëve potencialë nga anëtarësia.