Konferenca e Donatorëve për Ukrainën, Edi Rama: Shqipëria kontribuon me 1 mln euro

Në Konferencën e Donatorëve për Ukrainën në Varshavë, Shqipëria dhuroi 1 milion euro, bëri të ditur Kryeministri Edi Rama duke shpresuar t’i jepet fund luftës sa më shpejt.

“Në këtë konferencë ne do të kontribuojmë me 1 milion euro, e di që nuk do të ndryshoje në përfundimin e luftës pra mënyrën si po zhvillohet lufta, por ne jemi të nderuar që jemi këtu. Jam falenderues për kryeministrin polak që është pjesë e kësaj konference, për të bërë më të mirën për ukrainasit dhe të shohim sa më shpejt paqen,” tha Edi Rama në Konferencën e Donatorëve për Ukrainën në Varshavë e cila i dedikohet qëllimit të përbashkët për të mbështetur reagimin humanitar të OKB-së në Ukrainë, dhe ku kryetarët e shteteve dhe qeverive diskutuan hapat e mëtejshëm drejt mbështetjes së përpjekjeve të Ukrainës për të trajtuar sfidat ekonomike të krijuara nga lufta.

Ndryshe, Konferenca e Donatorëve për Ukrainën u organizua nga Kryeministri i Polonisë, Mateusz Morawiecki dhe Kryeministrja e Suedisë Magdalena Andersson, në partneritet me Presidentin e Këshillit Evropian, Charles Michel, dhe Presidenten e Komisionit Europian, Ursula von der Leyen.