Konventa Grupimit “Dhjetor ’90”, Berisha: Sot fitojnë ata që i besojnë revolucionit të vitit 1990!

Revolucionin sot do e fitojnë vetëm ata që i besojnë revolucionit të vitit 1990, tha Kryetari i Partisë Demokratike, Sali Berisha, në fjalin e tij në Konventën Kombëtare të Grupimit “Dhjetor ’90” duke shtuar se është e domosdoshme të kërkohet një rimendim i thellë i situatës, të kërkohet një vendosmëri dhe një besim për ta larguar këtë regjim ndërsa e pranoi se revolucioni nuk kryhet me një ditë.

“Është një kënaqësi e jashtëzakonshme të shpreh nderimin tim, të përulem me nderimin më të thellë para jush, para mijëra bashkëmoshatarëve tuaj, studentë, që me një guxim epik dolët në rrugë, të udhëhequr nga një bashkëmoshatar i juaj, student, të udhëhequr nga Azem Hajdari dhe u përballët dhëmbë për dhëmbë me diktaturën.

Protesta juaj kundër diktatorit dhe diktaturës në rrugët e Tiranës, ishte një kulm i guximit njerëzor.
Diktatura e Ramiz Alisë, që ishte diktatura e Enver Hoxhës, ndonëse e lodhur, përsëri ekzekutonte moshatarët tuaj në kufi, i zvarriste kufomat e tyre në qytete për të mbjellë terror, për të mbjellë frikë.
Askush nuk mund ta bënte atë që bëtë ju. Ishte guxim, ishte mençuri, ishte taktikë, ishte vendosmëri!
Nisët një revolucion demokratik, që përbën faqen më të ndritur të lëvizjes paqësore të shqiptarëve për liri, më të suksesshmen!

E nisët atë revolucion karshi një regjimi që mbante të shtypur për mbi 45 vite kombin e tij, në një diktaturë si asnjë tjetër në Europë dhe botë, në një kasaphanë të luftës së klasës, në një tirani të mjerimit, varfërisë dhe urisë, në një izolim të plotë dhe total. Në një indoktrimin ekstrem!

Nuk kishte kushte më të vështira, por forca juaj ishte mbinjerëzore, ishte e jashtëzakonshme.

Revolucioni triumfoi sepse ju patët mençurinë të besonit në forcën e lëvizjes paqësore.

U provokuar me dhjetëra herë, se në fakt PD-në ju e themeluat. Shqiptarët ju lartësuan dhe ju quajtën me të drejtë engjëjt e demokracisë. Ju u shpërndatë në katër anët për të themeluar PD-në, ju i sollët Shqipërisë pluralizmin.

Të gjitha këto, ju i realizuat në lëvizje paqësore. Edhe kur u vërsulën me plumba, me banda të Sigurimit në antimitingjet e tyre, ju vazhduat programin tuaj,” tha Sali Berisha duke shtuar se Lëvizja paqësore e këtij Grupimi ishte një revolucion i jashtëzakonshëm.

“Ndalem këtu për disa arsye!

Para se ju të mendonit të rrëmbenit armët, ju vendosët vetëflijimin në një akt madhështor sa vetë historia. U ngujuat për të shpëtuar universitetin tuaj dhe shqiptarët nga kulti i satanit të Enver Hoxhës.

U ngujuat në një grevë me vendosmëri ekstreme dhe ia dolët që Shqipëria të vërshojë drejt jush dhe të përmbysë bustin e diktatorit.

Ky revolucion njohu uljet dhe ngritjet, por përmbysi me votën e lirë diktaturën staliniste.
Cilat ishin tiparet e revolucionit që ju bëtë dhe drejtuat? Ishin të ngjashme me revolucione të tjera të vendeve ish-komuniste, por edhe dallonin me shumë prej tyre.

Të gjitha ishin revolucione që përmbysën klikat komuniste, por asnjë vend tjetër, asnjë rini tjetër, asnjë revolucion tjetër nuk operoi si ne në kushtet e një izolimi të plotë dhe total.

Disidencat kalonin nga njëri vend në tjetrin, lëvizjet ndiqnin njëra-tjetrën në vendet lindore, kurse në Shqipëri, pasi përcolli kryengritësit e 2 korrikut nëpër botë, Ramiz Alia arriti të rivendosë përsëri Perden e Hekurt. Pra, ishte një revolucion në kushtet e një izolimi të plotë,” tha lideri i opozitës duke e cilësuar këtë revolucion si revolucion për vokacionin perëndimor të kombit.

“Kombet e tjera, sado që në diktaturë nuk kishin njohur izolimin që njohën shqiptarët, nuk u shkëputën nga qytetërimi evropian, pati kufizime, por jo shkëputje. Kishte prej tyre që lëviznin pa viza ose me një sistem fare liberal vizash. Kurse në Shqipëri, viza ishte tmerr dhe ferr.

Pra, në kushtet tona, ne ia dolëm të çajmë edhe këtë izolim. Ne ia dolëm me ato parime të ecim drejt të ardhmes. Flamujt që valëvitëm në 90-tën ishte flamur amerikan, parullat e studentëve ishin ‘George Bush’”.

Revolucioni ynë ishte edhe revolucion i interesit kombëtar.

Në 90-ën, shqiptarët kudo që jetonin në Ballkan, jetonin të pushtuar. Në Shqipëri të pushtuar nga një regjim i egër barbar, në Kosovë nga serbët e kështu me radhë.

Por ne deklaruam se ylli polar i këtij revolucioni do jetë çështja kombëtare. Natyrisht me këtë deklaratë, ne morëm zemërimin e të gjithë atyre, të cilët kishin shfrytëzuar, mbanin të pushtuar trojet shqiptare.
Ndaj dhe e them këtu se ndër lëvizjet paqësore të këtij kombi, ky ishte revolucioni më i ndritur dhe fitimtar.

Data 11 dhjetor, sheshi i Qytetit Studenti ishte plot me qytetarë. Të gjithë prisnin çfarë vendimi do të marrë plenumi i Komitetit Qendror, do pranojë ultimatumin tuaj apo jo? Do i pranojë pikat apo jo?

Plenumi u mblodh. Në plenum pati anëtarë progresistë, që morën anën e studentëve, anën e pluralizmit. Por pati të tjerë që bënë thirrje hapur për tanke e armë kundër studentëve. Në krye të atyre që kërkuan tanke dhe armë ndaj jush ishte xhelati Spiro Koleka.

E përdor termin xhelat se po qe se marrim diktaturën, në njërën anë janë të përndjekurit, martirët, rezistentët, por nga anën tjetër janë xhelatët e tyre, që i çuan ata në burgje, kampe apo skuadra të pushkatimit. Ky është realiteti.

Sot mund të duket shumë i ashpër termi xhelat, por term tjetër nuk mund të ketë.

Ramiz Alia iu përgjigj duke i thënë se ata kërkojnë kokën time, jo tënden Koleka. Nuk vendosën të përdorin tanket, por pranuan ultimatumin tuaj.”

Por, sot, Kryetari i PD është i bindur se revolucionin do e fitojnë vetëm ata që i besojnë revolucionit të vitit 1990:

“Sot është një situatë më kritike, ose po aq kritike sa atëherë.

Pse është më kritike? Nuk mund ta mohojmë se revolucioni ynë në vitin 1990 ishte zinxhir. Diktaturat ranë njëra pas tjetrës.

E vërteta ishte se për Shqipërinë ishin jo të paktë, po të shumtë ata që mendonin që të qëndrojë siç është, një muze i socializmit, një Kubë në Adriatik.

E thotë shumë bukur ish-ambasadori gjerman, Verner Daum. Thotë se qeveritë tona nuk ishin dakord që ët destabilizohej Shqipëria.

Në revolucionin tonë atëherë, ishte vetëm një ambasador që na erdhi, ai ishte ambasadori i republikës mike të Hungarisë.

Sot ku jemi? Sot jemi në kushtet ku nuk kemi këtë kaskadë.

Por a kemi sot një narkoshtet apo një monokraci, një diktaturë krimi nga më të fuqishmet dhe më të rrezikshmet që ka njohur bota ndonjëherë?

Për fatin tonë, në 9 vite, PD u denervua, e humbi nervin

Dhe mos mendoni se e kemi fituar plotësisht akoma. PD ka nevojë të frymëzohet nga revolucioni i 90-ës.
Revolucionin sot do e fitojnë vetëm ata që i besojnë revolucionit të vitit 1990.

Ku ishim në 90-ën? Ishim në grevë urie, në marshime, në qytete e fshatra për të çuar dritën e të vërtetës. Na gjuanin me gurë, na gjuanin me dru, por vazhduam rrugën tonë,” tha Berisha i bindur se sot kërkohet një vendosmëri dhe një besim për ta larguar këtë regjim, dhe, revolucioni nuk kryhet me një ditë.

“Çfarë po ndodh para syve tanë? Shqipëria po tretet, Shqipëria po shuhet, Shqipëria po vdes.

Nëse një kombi i ikin në 8 vite 937 mijë vetëm në hapësirën evropiane dhe mbi 1 milion në botë, ku është e ardhmja e tij?

Kush do qëndrojë? Ata që nuk ka kush t’i varrosë.

Këto janë sirena të tmerrshme alarmi. Pse ta lëmë këtë vend të vdesë në këtë mënyrë?

Më kujtohet në vitin 1991 në parlament, ngrihet një ish-sekretar i Komitetit Qendror dhe thotë se: nuk më shkonte mendja kurrë që Enver Hoxha kishte tre dynymë qilima në shtëpi.

Po nipi i Spiro Kolekës po blen 4 milionë euro instilacion për të blerë influenca, për të bërë korrupsion, për të blerë mbështetje, për të blerë deklarata, me paratë e atyre që ikin me gomone.

Ai përmendi tre dynymë qilima, por Edi Rama bën 22 milionë euro fluturime me avion, sikur të ishte biri i sulltanit.

Ai përmendi tre dynymë qilima, por Edi Rama që vjedh nga mënngjesi deri në darkë dhe në çdo akt mbron vjedhjen e tij.

A mundemi ne të pajtohemi me këtë situatë? A mundet shqiptarët të pajtohen me këtë situatë?
Revolucioni nuk kryhet me një ditë. Partia humbi nervin, po nervi janë idealet.

Çfarë ndodhi me ne? Opozitë për të tretën herë pasi shpallëm masakër zgjedhore se ishin zgjedhjet më të këqija në vend, shkuam si dele dhe votuam borxhin e Edi Ramës në parlament. Po kishte gjë më të turpshme? Ia votuam borxhin atij që vjedh çdo qindarkë nga ai borxh,” pra, është e domosdoshme, kërkohet një rimendim i thellë i situatës, kërkohet një vendosmëri dhe një besim për ta larguar këtë regjim.

“Nëse nuk guxojmë t’i shohim gjërat drejt në sy, ne nuk fitojmë. Nëse trembemi nga të vërtetat, ne nuk fitojmë.

Ne duhet t’i mbrojmë të vërtetat me forcën më të madhe.

Ku jemi ne sot? Jemi para një agresioni, natyrisht jo ushtarak, por politik për të zhdukur opozitën shqiptare.

Por përse për ta zhdukur opozitën shqiptare? Që Edi Rama të sundojë me peqelepe sa të dojë.

Sigurisht një njeri ka luajtur rolin më kryesor dhe ky është George Soros, që ndan një ideologji të ekstremit të majtë, armiqësore kryekëput ndaj partive dhe vlerave konservatore. I cili ndan qëndrime armiqësore ndaj kombit shqiptar si ndarja e kufijve apo Ballkani i Hapur që emërtohej në nder të tij,” tha Berisha duke u ndalur te skandali i fundit!

“U faktua se Edi Rama, i biri i xhelatit që vari kundërshtarin politik, poetin disident, kontraktoi vrasës me pagesë: kryezbuluesin e institucionit më kryesor në SHBA, një tradhtar i vendit të tij.

Me grupin e tij, i paguar nga Edi Rama, shpallte në televizionet shqiptare, Sali Berishën si kukull të Putinit. Gjithçka për narrativën e shkatërrimit të opozitës.

Çështja McGonigal është një çështje shumë e thellë dhe ne do ia themi shqiptarëve.

Çështja nuk përfshin vetëm McGonigal. Sot në botë ushtojnë skemat e tij e gjobëvënies. Po kush mori pjesë në këtë skemë? Unë i bëj thirrje Kongresit dhe FBI të hetojë rolin e Edi Ramës dhe Yuri Kim në këtë gjobëvënie.

Edi Rama u thoshte të tjerëve se zoti Escobar më ka dorëzuar listën e biznesmenëve që do sanksionohen. Kjo është e vërteta.

Yuri Kim thërriste një e nga një biznesmenët në zyrë, pse financoni Foltoren se do sanksionoheni. A ishte kjo një skemë që të shkonin dhe të paguanin te Mark Rossini dhe McGonigal gjobat?
Çfarë ishte kjo skemë?

Pra, kjo ishte një skemë në të cilën Edi Rama po fuste në dorë, në skllavërim të plotë, biznesmenët me lista, kësaj radhe të dorëzuara nga Lulzim Basha. Po!

Po të mos ishte skema McGonigal, nuk kisha të drejtë të bëja asnjë lidhje para jush këtu. Por duhet të jesh naiv të mos bësh këtë lidhje. Prandaj i bëj thirrje Kongresit të SHBA, FBI, Departamentit të Shtetit të hetojë.
A ju kujtohet kur në televizionet shqiptare flisnin për 150 të sanksionuar? Çfarë ishte kjo? Bëhuni klientë të McGonigal, përndryshe jeni të sanksionuar,” tha Kryetari i Partisë Demokratike duke i bërë thirrje Grupimit “Dhjetor’90” të bashkohen me revolucionin, të bëjnë gjithçka për të çuar përpara këtë kauzë shpëtimtare për Shqipërinë dhe shqiptarët

“Edhe njëherë ju bëj thirrje ju, i bëj thirrje çdo shqiptari, të bashkohet me këtë revolucion. Të shpëtojmë Shqipërinë.

Nuk është një lëvizje e PD.

Por është një lëvizje së pari për fëmijët tanë, për veten tonë, për të shpëtuar Shqipërinë nga kjo monokraci, nga ky regjim kriminal. Është lëvizje për tu ngritur vigan kundër mafies shqiptare dhe ndërkombëtare,” tha Kryetari i Partisë Demokratike, Sali Berisha, duke përfunduar:

“Njerëzit që guxojnë, ata fitojnë.

Njerëzit që ndjehen të ndershëm nuk dorëzohen kurrë.

Ndaj ju ftoj sërish, kudo që jeni, të bëjmë gjithçka për të çuar përpara këtë kauzë shpëtimtare për Shqipërinë dhe shqiptarët.”

Ndryshe, në Konventën e sotme Kombëtare, Grupimi “Dhjetor ’90” pritet të zgjodhi kryetarin dhe kryesinë e re me 25 anëtar.

Kryetar i ri i Grupimit “Dhjetor ’90”, Konventa zgjodhi Ajet Ramçajn në garën me 4 kandidatë, ku:

Ajet Ramçaj mori 49 vota

Osman Stafa 28 vota

Ilirjana Agolli 8 vota

Ndue Lugja 5 vota.

Duke i uruar sukses Kryetari i dorëhequr Bislim Ahmetaj, premtoi mbështetje të pakursyer për Kryetarin e ri, Ajet Ramçaj, dhe Grupimin “Dhjetor’90:

“Suksese dhe urime garuesve dhe fituesit. Unë do të jem krah jush sa të kem frymë.”