Koronavirusi, Ilir Meta: Jemi seriozisht të ekspozuar, nënvlerësimi mund të jetë me pasoja kritike!
Presidenti i Republikës, Ilir Meta, ka kërkuar marrjen e masave më të forta për parandalimin e depërtimit të virusit vdekjeprurës në Shqipëri ndonëse ministrja e Shëndetësisë, Ogerta Manastirliu, tha se pasi Organizata Botërore e Shëndetit shpalli shpërthimin e koronavirusit në një emergjencë shëndetësore globale, ajo ka mbledhur Task-Forcën ndërsa garantoi qytetarët shqiptarë se deri më tani fatmirësisht nuk ka asnjë rast të personave të prekur nga koronavirusini në vend.
“Mendoj se pas shpalljes së gjendjes së emergjencës globale nga OBSH duhen marrë masat më të forta të mundshme, sanitare dhe epidemiologjike për të parandaluar këtë virus për të penetruar në vendin tonë. Aq më tepër kur janë konstatuar dy raste në Italinë fqinje,” tha Presidenti Meta duke shtuar se është koha për të marrë masat më të forta ndërsa përfundoi:
“Shqipëria ka një eksperiencë si parandalimi i suksesshëm i SARS dikur, por është e rëndësishme të theksohet se çdo nënvleftësim mund të jetë me pasoja kritike, inkurajoj masat më të forta parandaluese. Jemi ne një proces komunikimi, rastet në Itali dhe një rast në një vend tjetër fqinj e tregojnë qartë se jemi seriozisht të ekspozuar dhe duhet të parandalojmë me çdo kusht dhe mjet depërtimin virusit në vendin tonë”
Shqipëria është ndër vendet me rrezikshmëri të ulët edhe pse përveç Kinës virusi ka prekur dhe 18 shtete të tjera të botës, tha Manastirliu duke shtuar se strukturat shëndetësore do të rrisin masat në pikat hyrëse tokësore dhe detare, por dhe në Aeroportin “Nënë Tereza”.
“Do të rrisim brenda nivelit të planit të veprimit, përforcimin aktiv të survejancës. Do të përforcojmë masat gjurmuese për këto raste. Po ashtu do të vijojmë të kemi një zhvillim të koordinuar të masave të ISHP, Inspektoratit Shëndetësor, Spitalin Infektiv, në koordinim dhe bazuar në planet dhe udhëzimet e OBSH dhe në zbatim të rregullores ndërkombëtarë të shëndetit. Shqipëria ka survejancë të infeksioneve. Kemi një sistem që funksionon më së miri. Kemi një laborator të mirë, me stafe të trajnuara për inteligjencën epidemike. Kemi të gjitha masat që do të ndërmarrim në raport me shkallën e rrezikshmërisë. Bazuar në rekomandimet e OBSH është i nevojshëm që të gjithë strukturat të përçojnë masat mbi hetimin, gjurmimin në kohë të kontakteve dhe menaxhimin e tyre. OBSH dhe të dhënat që paraqet, ka treguar se kufizimi i njerëzve dhe mallrave mund të jetë më efektiv. Ndaj do të rrisim dhe këshillimin e udhëtarëve që udhëtojnë drejt Kinës, si një masë parandaluese,” tha Manastirliu duke përfunduar:
“Momentalisht ne jemi një vend me rrezik të ulët ndaj virusit, por s’do të thotë që mos të aktivizojmë shkallët e masave. Jemi në të gjitha pikat kufitare tokësore dhe detare, të cilat do të përforcohen dhe pas vendimit të fundit të OBSH. Nuk ka asnjë rast të virusit në Shqipëri, por do të përforcojmë masat për atë çka po ndodh sot në botë. Përveç Kinës, 18 vende të botës kanë raste të virusit.”
