Korrupsioni më i madh në historinë e Mercedes-Benz, dy menaxherë hetohen për ryshfet

Zyrat e kompanisë Mercedes-Benz në Sindelfingen pranë Shtuttgartit, janë kontrolluar në kuadër të një hetimi kundër dy menaxherëve të kompanisë që akuzohen për korrupsion.

“Akcioni po zbatohet për shkak të dyshimit për korrupsion gjatë procesit të punës,” ka sqaruar prokuroria e shtetit në Stuttgart.

Ndërkohë mediat gjermane raportojnë për hetimin kundër dy menaxherëve të Mercedes-Benz që kanë marrë ryshfet prej miliona eurove për të siguruar kontratat e furnizimit.

“Të dyshuarit akuzohen se arritën të ndikojnë në përzgjedhjen e furnitorëve të caktuar,” raportojnë mediat.

Gjatë kontrollit, i cili u krye gjatë fundjavës që shkoi, në zyrat e furnizimit janë konfiskuar një PC dhe një celular.

Kompania është shprehur se ky kontroll është kryer me kërkesën e vetë Mercedes-Benz.

“Mercedes-Benz është dëmtuar në këtë rast dhe ne vetë kemi ngritur padinë,” është shprehur përmes një komunikate kompania e madhe automobilistike, e cila, sipas disa mediave gjermane, ka refuzuar të tregoj se për çfarë shume bëhet fjalë, vetëm se ka konfirmuar që bëhet fjalë për rastin më të madh të korrupsionit në historinë e kompanisë.