Kosova dhe Shqipëria, me marrëveshje për ndërtimin e disa rrugëve

Fshatrat që janë në zonën e përbashkët mes Republikës së Shqipërisë dhe Republikës së Kosovës do të lidhen mes tyre përmes ndërtimit të disa rrugëve.

Hysen Durmishi, zëvendësministër i Ministrisë së Mjedisit, Planifikimit Hapësinor dhe Infrastrukturës (MMPHI) ka bërë të ditur se disa fshatra të thella në brezin kufitar në mes të Kosovës e Shqipërisë, do të lidhen me njëra – tjetrën.

Durmishi përmes një postimi në rrjetin social në Facebook ka shkruar se sot kanë nënshkruar protokollin për zbatimin e marrëveshjes për ndërtimin e rrugëve të fshatrave ndërkufitarë që ndërlidhin fshatrat ndërmjet Kosovës dhe Shqipërisë.

“Nëpërmjet kësaj marrëveshje përveç se do të ndërlidhemi më afër me njëri tjetrin ekonomikisht, bashkërisht do të kontribuojmë në vlerësimin e gjendjes dhe përmirësimin e rrugëve të fshatrave ndërkufitare që lidhin zonat kufitare Shqipëri-Kosovë”, ka thënë Durmishi.

Këto janë fshatrat: Zapod- Kërstec, Pogaj – Gorozhup dhe Dobrunë – Blinishtë.

“Zona e përbashkët në mes të Republikës së Shqipërisë dhe Republikës së Kosovës, e cila do të mbulohet me këtë program zhvillimi, është e përbërë nga Bashkia e Hasit dhe Kukësit në Republikën e Shqipërisë, si dhe Komunat e Prizrenit dhe Dragashit në Republikën e Kosovës. Këto janë fshatrat: Zapod- Kërstec, Pogaj – Gorozhup dhe Dobrunë – Blinishtë ”./Monitor/