Kosovë, konfiskohet pasuria e kriminelit serb Milan Radoiçiç

Ministria e Drejtësisë e Kosovës, përmes zyrtarëve të Agjencisë për Administrimin e Pasurisë së Sekuestruar dhe të Konfiskuar kanë konfiskuar pasuritë e Ish-Nënkryetarit të Listës Srpska, kriminelit Milan Radoiçiç, i cili mori përgjegjësinë për sulmin ndaj Policisë së Kosovës në Banjskë më 24 shtator të vitit të kaluar.

Pas sekuestrimit, Ministrja e Drejtësisë së Kosovës, Albulena Haxhiu, përmes rrjetit social Facebook bëri të ditur se për cilat prona të Milan Radoiçiçit bëhet fjalë:

Në aksionin që u zhvillua në veri të Kosovës, Agjencia për Administrimin e Pasurive të Sekuestruara dhe të Konfiskuara konfiskoi dy prona të paluajtshme në Mitrovicën e Veriut dhe një në komunën e Zubin Potokut.

Mësohet se me urdhër gjykate u konfiskua restoranti Grey dhe një banese në katin e gjashtë mbi restorantin Grey, dhe vila e famshme e kriminelit Milan Radoiçiç buzë liqenit të Ujmanit.

Ndryshe, pas sulmin ndaj policisë së Kosovës në Banjskë më 24 shtator të vitit 2023 ku mbeti i vrarë efektivi i policisë Afrim Bunjaku, INTERPOL lëshoi fletarrestin për Milan Radoiçiçin me kërkesë të Kosovës, por deri më sot nuk është ngritur ndonjë aktakuzë ndaj tij ndonëse ishte paralajmëruar.