KPK, shkarkohet gjyqtarja Semiramis Hoxholli

Komisioni i Pavarur i Kualifikimit, KPK, ka shkarkuar sot nga detyra gjyqtaren e Gjykatës Administrative të Tiranës, Semiramis Hoxholli.

Gjatë seancës dëgjimore, Hoxholli u pyet rreth mosdeklarimit të dënimit të vëllait të saj në Greqi për trafik droge, si dhe iu kërkuan shpjegime për një transfertë që kishte kryer për llogari të një pedagogu të saj drejt Kinës.

Hoxholli i kërkoi Komisionit të besonte se ajo dhe prindërit e saj nuk kishin dijeni të dënimit ndërsa për transfertën ajo u shpreh se nëse do ti kërkohej në këto rrethana dhe pas asaj që kishte mësuar, nuk do ta bënte më këtë favor.

Ndryshe, Semiramis Hoxholli përfundoi studimet në Shkollën e Magjistraturës në vitin 2016. Pas stazhit në Gjykatën e Tiranës, ajo u emërua gjyqtare në Gjykatën Administrative të Tiranës, ku e ushtroi funksionin deri në momentin e shkarkimit.

Trupi gjykues i rivlerësimit u kryesua nga Etleda Çiftja, relatore Alma Faskaj dhe anëtare Surla Zhegu.