KQZ certifikon rezultatet e zgjedhjeve të 9 shkurtit në Kosovë
Me nëntë vota për e dy kundër Komisioni Qendror i Zgjedhjeve, KQZ, e ka certifikuar rezultatin e zgjedhjeve të 9 shkurtit në Kosovë. Kundër votuan Sami Kurteshi e Alban Krasniqi nga Lëvizja Vetëvendosje.
Në fjalimet e tyre të dy anëtarët e KQZ-së nga Lëvizja Vetëvendosje u shprehën se nuk mundur të votojnë për një rezultat të cilin e kanë kundërshtuar dhe pas rrëzimit nga PZAP e Gjykata Supreme do t’i drejtohen Gjykatës Kushtetuese.
“Në këtë rast po e informoj KQZ-në dhe opinionin se deri të përfundojnë të gjitha mundësitë ligjore, unë nuk mund ta votoj certifikimin e këtij rezultati,” tha Sami Kurteshi.
Më i ashpër në këtë drejtim ka qenë Alban Krasniqi i cili tha se kjo ditë për dikë mund të duket ditë feste, por, sipas tij, shenjat e zeza që ka lënë ky proces dhe rreziku që të kalojnë pa marrë rrugën e organeve të drejtësisë, përbënë rrezik për demokracinë.
“Deformimi i rezultatit që vjen prej hezitimit apo refuzimit qoftë prej PZAP-it, qoftë Supremes kur kanë qenë të renditura faktet, përbënë për mua një thirrje të hapur. Këto dy institucione i kanë thënë shkelësve të ligjit që të vazhdojnë në të ardhmen me manipulim të procesit, sepse e kanë mbështetjen e tyre,” tha Krasniqi ndërsa uron që shpejt të bëhet vetingu e të pastrohet “bërllogu”, siç tha ai, nga institucionet.
“Në vitin 2025 të kemi një situatë të tillë ku vërehen qartë shkeljet e bëra, manipulimi dhe të mos kemi veprimin e institucioneve që paguhen për të kryer detyrën e tyre, e këto shkelje nuk i kemi paraqitur vetëm ne, por edhe të tjerët, dhe të mos merret asnjë veprim për shkak qoftë të ndërhyrjeve nga brenda e jashtë, në këto institucione, është pak të themi le të mbetet në ndërgjegjen e tyre, por unë uroj të ndodhë një veting e ta heqë bërllokun nga këto institucione që na pamundëson votën e lirë, vullnetin e lirë të qytetarëve,” tha Alban Krasniqi.
Sipas rezultateve përfundimtare, tashmë edhe të certifikuara, Lëvizja Vetëvendosje është e para me 42.30 për qind, PDK me 20.95 për qind, LDK ka 18.27 për qind dhe AAK -Nisma me 7.06 për qind.
KQZ nën ndikimin e analistave batonë e buzhalë
Edhe në këtë institucion u vërejtë ndikimi i bantonëve dhe buzhalëve që gjithçka që propozohet nga Lëvizja Vetëvendosje duhet të kundërshtohet madje edhe kur ka të drejtë, që fatkeqësisht doli dhe nga goja e kreut të KQZ-së.
Ndonëse Alban Krasniqi si anëtar i KQZ-së nga Lëvizja Vetëvendosje bëri një reagim logjikë se nuk mund të heqë dorë askush nga mandati i deputetit dhe të zëvendësohet pa u bërë certifikimi i rezultatit, kjo u kundërshtua nga Kreu i KQZ, Kreshnik Radoniqi me një arsyetim që një njeri normal nuk duhet ta nxjerrë nga goja, qofshin ata vetë Batoni e Buzhala!
“Nuk bëjmë zëvendësime kur nuk kemi mandate të deputetit. Mendoj që detyrë e jona është që t’i certifikojmë rezultatet. Nëse ka kandidatë që kanë dhënë dorëheqje për një arsye apo tjetër, është mirë të shkojnë siç është procedura. Ne e bëjmë certifikimin e tek më pas ka kuptim procedura e zëvendësimeve, të cilën e kemi bërë edhe në vazhdimësi. Ne veç asamblistët i zëvendësojmë, nëse flasim proceduralisht,” tha Alban Krasniqi, por, kreu i KQZ-së, Kreshnik Radoniqi duke e kundërshtuar tha se kjo nuk do të ishte hera e parë që do të bëhej kjo meqë raste të tilla kishte edhe në të kaluarën.
“Pikë së pari kish qenë një praktikë e njëjtë edhe në të kaluarën që para certifikimit është bërë tërheqja e kandidatit dhe është zëvendësuar, e pastaj është certifikuar me të zëvendësuarin. E dyta është se tërheqjen e kandidaturave për certifikim të rezultatit kandidatët e kanë bërë para certifikimit!”
Edhe pse Krasniqi insistoi se fokusi i tyre duhet të jetë te certifikimi dhe zëvendësimi i tyre me automatizëm, pse Radoniqi mendon kështu e vulosi Ilir Gashi anëtar i KQZ nga PDK, duke e bërë të qartë se ka dispozita ligjore edhe që nuk i respektojnë.
“Edhe në këtë rast kemi të bëjmë edhe me ekzekutivin lokal dhe qendror. Ligji thotë se nuk mund të certifikohen pa u deklaruar paraprakisht për pozicionin të cilin dëshirojnë ta mbajnë. Ne nuk mund të respektojmë këtë dispozitë ligjore,” tha Ilir Gashi.
Kështu, Gazmend Muhaxheri i LDK, Kryetar i Komunës Pejë, Imri Ahmeti i LDK-së, Kryetar i Komunës Lipjan, dhe Bedri Hamza i PDK-së, Kryetar i Komunës Mitrovicë Jug, kanë bërë kërkesë në KQZ për heqje dore nga marrja e mandatit të deputetit dhe zëvendësohen: Gazmend Muhaxheri me Arben Gashin, Imri Ahmeti me Paris Gurin, ndërsa, Bedri Hamza me Rashit Qalajn.
