Krimi prodhoi votën, vota prodhoi krimin, Berisha: Të shkëpusim këtë rreth fatal, vota të prodhojë ligj!

Krimi prodhoi votën, vota prodhoi krimin. Të ngrihemi për të shkëputur këtë rreth fatal, tha Kryetari i Partisë Demokratike, Sali Berisha, para Kryesisë, dhe të bëjmë që vota të prodhojë ligjin, vota të garantojë lirinë, vota të prodhojë të ardhmen!

“Na takon detyra të përballemi, të ngrihemi për të shkëputur rrethin fatal të krijuar: krimi prodhon votën, vota prodhon krimin. Krimi votën, vota krimin, nuk ndodh kund veçse në Shqipëri. Ne do bëjmë që vota të prodhojë ligjin, vota të garantojë lirinë, vota të prodhojë shpresën, vota të prodhojë të ardhmen. Këtu jemi ne, dhe këtu qendrojmë,” tha Sali Berisha para Kryesisë së PD e cila mori vendim për kandidatët që do të garojnë në zgjedhjet e 24 Shtatorit për Kryetar të Bashkisë Kukës.

Kështu, Kryesia e Partisë Demokratike për Primaret për zgjedhjet e pjesshme lokale për Kryetarin e Bashkisë Kukës që do të mbahen të dielën, 27 gusht 2023, miratoi 6 kandidatura: Ardian Elezi, Arif Rexhmati, Emri Vata, Gëzim Shehu, Uran Cengu dhe Ylber Zeneli.

Ndërkohë që kandidati i PD në zgjedhjet e 14 Majit, Admir Sinamati ka bërë të ditur se ka vendosur të mos garoj në këto zgjedhje për kryetar të Bashkisë Kukës.

“Me gjithë thirrjet dhe insistimin e pafundëm nga ju, vërejtjeve apo mosdakordësisë së një numri të kufizuar individësh (që militojnë një pjesë me shpirt e pjesa dërrmuese e tyre sa për t’u dukur në PD) për të kandiduar më 24 Shtator 2023; unë kam vendosur: të mos garoj në këto zgjedhje,” shprehet Sinamati përmes rrjetit social Facebook dhe nga zermra uroj që Kukësi më 24 Shtator të votojë kandidatin e PD!

Ndërsa ai që kontribuoi në humbjen e Dr.Sinematit më 14 Maj dhe vjen nga radhët e llumit Lulzim Basha, Arif Rexhmati, ndonëse u konsiderua si simbol bashkimi, pas mbledhjes së Kryesisë shfaqi dyshime për Primaret e organizuara nga ata që nuk e kanë për zemër Llullin e Edi Ramës, dhe nuk është dakord me këtë lloj konfirmimi të kandidaturës por përcaktim të drejtëpërdrejtë!.

Fjala e Kryetarit të PD

Së pari, ju përshëndes dhe ju kërkoj ndjesë për vonesën, por një pjesë e jona ishte në një takim të organizuar për situatën e sigurisë në vend, pushtetin dhe krimin, krimin dhe pushtetin.

Kështu që, diskutimet aty detyruan edhe vonesën për fillimin e kësaj mbledhje, e cila shënon një mbledhje ku ne marrim vendime për Bashkinë e Kukësit, por gjithashtu shënon startin e një përpjekje të madhe për analizën, ndërgjegjësimin e shqiptarëve për farsën elektorale 2023, analizën dhe përgjegjësitë e PD, si dhe qendrimet që duhet të mbajmë ndaj kësaj farse më e shëmtuara në historinë e pluralizmit politik shqiptar.

Në Shqipëri del e qartë si kristali, se opozita është në misionin më të rënsishëm të historisë së saj që nga themelimi, mision i cili ajo duhet të përmbysë këtë shtet mafioz, këtë sundim të mafies të kryesuar nga Edi Rama i cili nuk ka asnjëlloj interesi tjetër qytetar, kombëtar, shoqëror, civil, përveç pasurimit të tij të çmendur dhe klanit të tij. Edi Rama është i vendosur të sakrifikojë çdo ligj, çdo parim, çdo normë, çdo marrëdhënie në mënyrë që të konsolidojë pushtetin e tij, të vazhdojë pushtetin e tij.

Zbulimet e fundit të shërbimeve inteligjente franceze, belge, holandeze dhe britanike dëshmojnë këtu se shoqëria shqiptare e tëra noton mbi krimin, drogën dhe se në Shqipëri vendimarrës absolut është krimi. Vendimarrës që po rrënon më shumë se çdo luftë ka rrënuar një vend, më shumë se çdo luftë ka rrënuar një shoqëri.

Në revanshin e tij krimi i organizuar kapi zyrtarisht me mandat parlamentar drejtimin e ministrisë të presupozuar të antikrimit. Kështu që, detyra e opozitës është të bindë çdo anëtar, mbështetës të saj të ngrihemi në protesta të qendrueshme, të mos ulim kokën.

T’i shtrish qafën krimit, do të të thotë të presë kokën, dhe këtë shqiptarët nuk duhet ta bëjnë kurrë. Këta janë kriminelë që duhet të largohen një minutë e më parë nga pushteti. Këta nuk respektojnë asnjë rregull, asnjë normë, asnjë parim, asnjë ligj. Këta i kanë shndërruar pasuritë e këtij vendi në pasuri personale të klaneve dhe familjeve të tyre. Këta u kanë bërë besëprerin më të madh qytetarëve shqiptarë, ua kanë marrë shqiptarëve të dhënat personale dhe ia dorëzuan këto ditë krimit me Taulant Ballën.

Sot, më të mprehta se kurrë janë detyrat e opozitës. Askush nuk mund t’i japë përgjigje kësaj situate përveç opozitës dhe shqiptarëve. Është absurde, është njësoj si të shndërrohesh në personazh romanesh të presësh që SKAP-i i partisë do të ndërtojë shtetin. Jo, nuk e bën dot! Ata që Kërkojnë këtë, nuk janë realistë. Jo që është një instrument i tij, por edhe po të mos ishte një instrument i tij në këtë det krimi, askush nuk mund t’i jipte përgjigje përveç qytetarëve të revoltuar. Lëre që sot ata janë një, janë një së bashku kundër opozitës, kundër popullit opozitar, kundër popullit idealist që denoncon dhe nuk pranon krimet e tyre. Ata janë një tani, të gjithë së bashku, me polici, me prokurori, me SHIK, me parlament, me të gjithë. Kjo është e vërteta.

Por ne me shembullin tonë duhet të udhëheqim, çdo demokrat, ço demokrate duhet të udhëheqë, çdo mbështetës i yni duhet të udhëheqë. Duhet të imagjinojmë atë që nuk kemi imagjinuar. Protestat më të fuqishme që nuk janë ndërmarrë ndonjëherë. Unë kam shumë besim, pavarësisht nga vështirësitë, por ne këtë mision do ta përmbushim.

Natyrisht, na takon detyra të përballemi, apo të merremi njëkohësisht me disa çështje. Nuk kemi zgjidhje tjetër. Këto ditë dalin nga botimi vëllimet e raportit, ku është dokumentuar në mënyrën më të vërtetë farsa më e turpshme elektorale, por ato nuk do të mbeten kurrë një letër e vdekur. Ato do të shndërrohen në një burim të fuqishëm nxitjeje, detyrimi për çdo qytetar. Të ngrihemi për të shkëputur rrethin fatal të krijuar: krimi prodhon votën, vota prodhon krimin. Krimi votën, vota krimin, nuk ndodh kund veçse në Shqipëri.

Ne do bëjmë që vota të prodhojë ligjin, vota të garantojë lirinë, vota të prodhojë shpresën, vota të prodhojë të ardhmen. Këtu jemi ne, dhe këtu qendrojmë.

Ju faleminderit!