Kriza e Kosovës po merr përmasa, Alizoti: Shqipëria duhet ta ketë rend dite!

Situata e tensionuar pas rrëmbimit të tre policëve kosovarë nga forcat serbe në veri të Kosovës dhe rreziku i degradimit të kësaj situate, sipas deputetit të Partisë Demokratike Tomor Alizoti, duhet të merret seriozisht, dhe ai kërkoi në seancën e sotme plenare të Parlamentit të Shqipërisë, që të futet në rendin e ditës.

“Kriza e Kosovës po merr përmasa. Rëndësia sot edhe në media botërore është kriza në Kosovë e cila mund të agravojë. Shqipëria me përvojën e saj diplomatike duhet ta ketë rend dite. Ata janë vëllezërit tanë. Merreni seriozisht këtë gjë,” tha deputeti Tomor Alizoti duke përfunduar:

“Kriza atje po degradon. Kriza prodhon krizë!”

Ndryshe, që nga 29 Maji situata në veri të Kosovës vazhdon të jetë e tensionuar pas sulmit të kriminelëve serbë ndaj forcave të KFOR-it ndërsa dje kulmoi me rrëmbimin e tre policëve kufitarë.