Shehu: Zero taksë për kuksianët, kërkesë e panegociueshme. Ja zgjidhja…

Pas protestës së qytetarëve të Kukësit lidhur me taksën në Rrugën e Kombit dhe arrestimit të dhjetëra protestuesëve, Kryeministri i Shqipërisë, Edi Rama ka kërkuar falje për gabimet e qeverisë në procedimin e vendosjes së kësaj takse, por qytetarët  që kundërshtuan këtë procedim të taksës vazhdojnë të jenë në burg.

Sot, kur tensionet janë në rritje në mes të qytetarëve të Kukësit dhe Kryeministrit Edi Rama, Kryebashkiaku i Kukësit, Bashkim Shehu, në një intervistë ekskluzive për PaFrikë.al tregon pse Kukësi  është kundër taksës në Rrugën e Kombit, pse zero taksë për kuksianët është kërkesë e panegociueshme me qeverinë shqiptare dhe Z. Rama, dhe në fund sugjeron edhe një zgjidhje për daljen sa më shpejt nga kjo situatë.

Me këtë rast ai i bënë një bilanc edhe punës së tij si Kryetar i Bashkisë së Kukësit, dhe referuar kësaj eksperience si dhe statutit të ri të Partisë Demokratike, jep dhe vlerësimin për kohën dhe afatet e përzgjedhjes së kandidaturave për zgjedhjet e ardhshme për pushtetin lokal që priten të zhvillohen në vitin 2019.

Konflikti në mes të qytetarëve të Kukësit dhe kryeministrit vazhdon. Cila është kërkesa primare që Ju si kryebashikak i Kukesit do t’ja bënit kryeministrit Edi Rama ?

Kryeministrit Z. Edi Rama i sugjeroj të mbështesë Kukësin me një paketë të plotë investimesh, të takohet me qytetarët e Kukësit ballë për ballë dhe t’ju japë shpjegime pse ndodhi ajo situatë për të cilën vetë Z. Rama kërkoi ndjesë, të lirojë urgjentisht kuksianët që ndodhen në burg dhe të stopojë përndjekjen e kuksianëve.

Çfarë do të thotë për Kukësin taksa për Rrugën e Kombit?

Sipas INSTAT :

1.Qarku i Kukësit ka numrin më të ulët të të punësuarve në vend (1.4%).

2.Të ardhurat për frymë janë 35.7% më të ulëta se mesatarja e vendit.

3.Familjet kanë shpenzimet më të ulëta në rang vendi për veshje (2.3% e totalit të shpenzimeve).

Ja pse Kukësi  është kundër taksës në Rrugën e Kombit. Zero taksë për kuksianët është tashmë kërkesa jonë e panegociueshme me qeverinë shqiptare dhe me Z. Rama.

Vitin e ardhshëm janë zgjedhjet për pushtet lokal. Nëse i bëni një bilanc punës tuaj, ka diçka që ju ka ngelë peng ose nuk keni arritur ta realizoni sepse nuk kishit mbështetje?

Janë shumë projekte të Bashkisë Kukës të realizuara për kto tre vjet dhe shumë që qëndrojnë në pritje të miratimit nga qeveria shqiptare, do të doja të ishin hapur më shumë vende pune për kuksianët por për arsye që kjo qeveri ska asnjë projekt serioz për zonat si Kukësi, Hasi dhe Tropoja. Megjithëse Kukësi është shumë i pasur me pasuri nëntokësore dhe ujore  ne skemi akses në burimet tona nëntokësore, ujore pasi të gjitha të ardhurat nga kromi, hekuri nikeli, hidrocentralet shkojnë për qeverinë qendrore dhe kjo është e papranueshme nga unë si Kryebashkiaku i Kukësit dhe për kuksianët duhet urgjentisht qeveria të ulët dhe të diskutojë me të zgjedhurit vendorë dhe me qytetarët për gjetjen e një zgjidhje dhe daljen sa më shpejt nga kjo situatë.

 Nisur nga eksperienca si kryebashkiak, kur mendoni se PD duhet të përzgjedh kandidaturat për kryetar bashkie, referuar edhe statutit te ri?

Unë personalisht  mendoj që për Tiranën duhet të ishte caktuar Kandidati. Unë bashkë me kolegët e tjerë e kemi biseduar me Z. Basha dhe pothuajse të gjithë jemi në një mendje që maksimumi fundi i shtatorit kandidaturat duhet të jenë përcaktuar nga strukturat përkatëse të partisë demokratike në bazë të statutit të ri të sapo miratuar. Nga përvoja ime e fushatës në 2015-ën me ndarjen e re territoriale duhen të paktën dy muaj që të shkosh në çdo fshat të Kukësit per të shpalosur programin. Prioritet duhet tu jepet Bashkive që nuk drejtohen nga Partia Demokratike pasi aty ska arsye pse kandidatët të mos fillojnë punë sa më shpejt të jetë e mundur.

Faleminderit dhe Suksese në punën tuaj!