Kryeministri Albin Kurti përkujton Pajazitin, Zejnullahun dhe Hoxhën

Zahir Pajaziti, së bashku me dy bashkëluftëtarët, Hakif Zejnullahun dhe Edmond Hoxhën, kanë kontribuuar që UÇK-ja të shndërrohet në ushtri të vërtetë, duke u bërë bartëse e çlirimit të vendit bashkë me ndërhyrjen e NATO-s, tha Kryeministri Albin Kurti pasi bëri sot homazhe te shtatorja e Ish-Komandantit të UÇK-së, Zahir Pajaziti në Prishtinë.

“Së bashku me ministrin e Punëve të Brendshme, Xhelal Sveçla, ministrin Mehaj dhe me deputetë të LV-së, vendosëm lule të freskëta te përmendorja e komandant Zahir Pajazitit. Ai është udhërrëfyes për çdo qeveri dhe për të gjitha institucionet e shtetit tonë,” tha Albin Kurti duke shtuar se komandant Zahir Pajaziti ka dhënë kushtrimin e lirisë shumë herët dhe ka mobilizuar dhe zgjeruar radhët e ushtrisë.

“Bashkë me Hakif Zejnaullahun dhe Edmond Hoxhën këta ishin luftëtarë që nuk kursyen asgjë, por goditnin forcat armike serbe dhe kontribuonin që UÇK-ja të shndërrohet në ushtri të vërtetë e që u bë bartëse e çlirimit të vendit tonë bashkë me ndërhyrjen e NATO-s,” tha Kryeministri i Kosovës, Albin Kurti duke përfunduar:

“Ne që e mbajmë mend atë kohë që të gjithë duhet ta dimë prej nga vijmë që të jemi të sigurt për rrugën përpara. Këtyre që kontribuuan ua kemi borxh që të ardhmen ta bëjmë më të mirë.”