Kryeministri i Shqipërisë hesht por jo Vuçiç: Bisedova me Edi Ramën për…

Kryeministri Edi Rama vazhdon të mbajë sekrete bisedat që zhvillon me Presidentin e Serbisë, Aleksandar Vuçiç, por ky i fundit bisedat me Ramën vazhdon ti shfrytëzoj për përdorim të brendshëm duke i bërë të ditur serbëve se hapja e rrugës drejt Detit Adriatik po vazhdon me sukses me Kryeministrin e Shqipërisë në krye!

Kështu, Kryeministri Edi Rama e nisi sot ditën me lajmin mbi projektin ambicioz të Portit të ri të Durrësit, paraqitur në mbledhjen e përbashkët të dy qeverive, Shqipëri-Kosovë, si projekt i integruar me projektin e hekurudhës Durrës-Prishtinë dhe portin e thatë në Prishtinë, që do të transformojë rrënjësisht jo vetëm infrastrukturën tregtare mes Shqipërisë dhe Kosovës.

Por Presidenti i Serbisë, Aleksandar Vuçiç, ndryshe nga propaganda e Edi Ramës me Kosovën e Baton Haxhiut, bënë të ditur se sot ka biseduar online me Kryeministrin e Shqipërisë mbi Samitin e ardhshëm për Ballkanin Perëndimor në Bruksel, bisedë për të cilin Rama heshti.

“Kemi rënë dakord që pas konsultimeve me qeveritë tona dhe këshilltarët, nesër në mesditë do të publikojmë vendimin nëse do të marrim pjesë në këtë takim ose jo,” bëri të ditur Aleksandar Vuçiç përmes rrjetit social Instagram duke shantazhuar edhe Bashkimin Europian dhe Presidentin e Këshillit Evropian, Charles Michel, i cili e ka ftuar Vuçiçin ashtu si dhe Edi Ramën, ndërsa shtoi se kanë shkëmbyer mendime mbi hapat e ardhshëm të nismës “Ballkani i hapur”, panairin e verës, ku do të mbledhen prodhuesit më të mirë të verës nga i gjithë rajoni, si dhe takimin e radhës ku do të shqyrtohen çështje të shumëta për interesin e qytetarëve.

“Së bashku luftojmë për një perspektivë të qartë të Ballkanit Perëndimor, bashkëpunimin edhe më të ngushtë dhe lidhjet tona më të ngushta,” tha Aleksandar Vuçiç duke folur për bisedën për të cilën deri në publikimin e Presidentit të Serbisë konsiderohej edhe sekrete.

Ndryshe, sot në mëngjes, Presidenti i Serbisë, Aleksandar Vuçiç, ka zhvilluar një bisedë online me Kryeministrin e Shqipërisë, Edi Rama dhe Kryeministrin e Maqedonisë së Veriut, Dimitar Kovaçevski.