Kryeministri Rama paralajmëron fermerët: Supertaksë për ata që lënë tokat djerrë!

Gjatë një takimi me fermerët në Dvoran të Korçës, Kryeministri Edi Rama paralajmëroi fermerët se do të vendosë taksim të lartë, për ata që nuk e punojnë token. Ai deklaroi që Ministrat tashmë kanë nisur punën për të rregulluar me ligj vendosjen e taksës për këdo që nuk e shfrytëzon pronën në fshat.

“Sot, Shqipëria punon dyfishin e tokës bujqësore edhe pse ka akoma copëza. Për këto ne duhet të marrim disa masa të reja që po i përgatisim për një supertaksim të lënies së tokës djerrë. Nuk mund ta lësh tokën e bukës djerrë, jepe ta punojnë ose punojë vetë, në mënyrë që të shfrytëzojmë çdo metër tokë. Si qenka kjo që bujqësia ka marrë të tatëpjetën?!”, u shpreh Rama.

Pas paralajmërimit, raporton Monitor, Kryeministri Edi Rama u bëri thirrje fermerëve të bashkohen dhe të krijojnë kooperativa në funksion të investimeve të përbashkëta në mënyrë që të ketë më shumë prodhim.