“Kryepokrurori i ri, lidhje me krimin”, bashkohet opozita kroate në protestë: Mjaft më!

“Mjaft më! Menjëherë në zgjedhje!” është thirrja nga protesta e 11 partive parlamentare të opozitës kroate që po zhvillohet sot në Zagreb, duke kërkuar ndalimin e korrupsionit, krimit, dhe shpalljen e menjëhershme të zgjedhjeve.

Shkak i bashkimit të opozitës kroate aq shumë të përçarë, që u ngrit edhe në këmbë, është emërimi i Ivan Turudiçit për Kryeprokruror të ri të Shtetit, për të cilin thuhet se shoqërohet me botën e krimit, gënjen dhe ka dhënë informacione nga hetimet personave që nuk u duhej dhënë në asnjë mënyrë.

Ndryshe, Ivan Turudiç i cili u bë njohur si gjykatës për vendimet në procesin kundër Ish-Kryeministrit të Kroacisë, Ivo Sanader, të akuzuar për ryshfet, Ish-Zv/Kryeministrit, Damir Polançec, dhe Ish-Ambasadorit, Neven Juric, të mërkurën mori besimin e 78 deputetëve, 60 votuan kundër dhe dy abstenuan, moment kur opozita e shpalli të vdekur drejtësinë kroate.

Në garë për Kryeprokurorin e ri të Shtetit ishin edhe tre kandidatë: prokurori Mladen Dragiçeviç, zv/kryeprokurori aktual i Shtetit Emilijo Kalabriç dhe zv/kryeprokurori i Qarkut Split, Niksha Wagner.