Kryeprokurori i ri/ U skualifikua nga KLP, Gjykata rrëzon padinë e kandidatit Lulzim Alushaj

Sot Gjykata e Apelit Administrativ duke rrëzuar padinë për Ish-kandidatin për Prokuror të Përgjithshëm, Lulzim Alushaj, i cili u skualifikua nga Këshilli i Lartë i Prokurorisë, KLP, zhbllokoi garën për zgjedhjen e Kryeprokurorit të ri.

Pas vendimit të Gjykatës, Lulzim Alushaj u shpreh:

“Jam kurioz për argumentet e rrëzimit të padisë. Vendimmarrja e KLP ishte e cunguar dhe jo ligjore”.

Ndryshe, Lulzim Alushaj u skualifikua nga Këshilli i Lartë i Prokurorisë, me argumentimin se nuk plotësonte kushtin që të kishte 15 vjet përvojë pune si jurist i spikatur. Lulzim Alushaj e ankimoi vendimin në Gjykatën e Apelit Administrativ, situatë e cila “bllokoi” garën deri në shqyrtimin e çështjes.

Tashmë kandidatë për postin e Prokurorit të Përgjithshëm janë prokurori i Krimeve të Rënda, Olsjan Çela, prokurorja e Apelit të Tiranës, Fatjona Memçaj, si dhe Kryeprokurorja e Përkohshme, Arta Marku.