Ku është Sajmir Tahiri, po….?
Sot prodho një ngjarje më të madhe, që të harrohet e djeshmja, dhe nesër një edhe më të madhe që të harrohet e sotmja.
Pak a shumë kjo ishte mënyra sesi qeveria socialiste e drejtuar nga Fatos Nano vite më parë krijonte kaosin që nuk lejonte një reagim të fortë qytetar për skandalet që ndodhnin në atë kohë.
Formula Nano duket se është huazuar dhe po zbatohet më së miri sot nga Edi Rama. Ndoshta kjo është e vetmja gjë që Rama nuk ka zhbërë në partinë që drejtoi nga 1991 deri në 2005 Fatos Nano, dhe nga ky vit njeh si lider vetëm Edi Ramën.
Me mjeshtëri apo dredhi, me kontroll mediatik ose jo, për faj të opozitës apo jo, me një shoqëri të lodhur ose jo, Rama ka mundur jo vetëm t’ia hedhë pa shumë kokëçarje skandaleve që ka prodhuar qeverisja e tij, por edhe të mos i japë kohë askujt të reagojë.
Shikoni se çka ndodhur në muajt e fundit për të kuptuar se gjithçka bëhet me një dirigjim perfekt, thjesht dhe vetëm duke shpërndarë vëmendjen.
Ish-ministri i Brendshëm, Saimir Tahiri, krahu i djathtë i Edi Ramës në mandatin e parë të qeverisjes, i akuzuar dhe nën hetim zyrtarisht për trafikun e drogës, për disa muaj u kthye në kalin e betejës mes pozitës dhe opozitës, kundërshtarëve dhe mbrojtësve, militantëve të majtë e të djathtë. Sot askush nuk flet më, ai u harrua. Me koshiencë ose jo, për të nuk flet më as opozita politike.
Pse? Sepse pas Tahirit doli video e Babales, ku vëmendja u përqëndrua te Agron Xhafaj, vëllai i ministrit të Brendshëm, i akuzuar për trafik droge, i dënuar në Itali për këtë akuzë. Aksioni u fokusua tek Xhafajt, kërkohej arrestimi i Agronit dhe largimi i Fatmirit.
Në Tiranë u organizua një protestë, më pas FRPD dhe LRI vendosën të organizonin çdo pasdite poshtë zyrave të Ministrisë së Brendshme protesta, të cilat u shuan si me magji.
Në qendër të vëmendjes u kthye Teatri Kombëtar, sepse qeveria hartoi dhe shpërndau një draft, i cili i hap rrugë një projekti të vjetër për shembjen e godinës aktuale, ndërtimin e një Teatri të ri, pas të cilit do të ngrihen 1, 2, 3… kulla. Artistë e aktorë që protestojnë, opozita që i mbështet, disa qytetarë që i bashkohen dhe nuk është çudi që në fund të javës edhe kjo protestë të sfumohet ashtu sikundër ka ndodhur edhe me të tjerat.
Rama u shfaq në Dibër, ku tha se do të niste ndërtimin e rrugës së Arbrit. Bëri një miting këtë herë, ndërsa më parë (2013, 2015, 2017) thjesht sa kishte deklaruar se qeveria e tij do të ndërtonte këtë rrugë. Tërhoqi vëmendjen duke shkuar me helicopter të ushtrisë, duke shkëmbyer ca batuta me qytetarë, apo duke treguar se i kishte marrë PDIU-së së Idrizit dy deputete, a thua se deri tani ato nuk kishin votuar pro çdo nisme të paraqitur nga Edi Rama.
Më pas vëmendjen e çoi në Has, ku me votat e këshilltarëve të majtë, u shpall “Qytetar Nderi”, atentatori i Azem Hajdarit, Gafur Mazreku. Veprimi shkaktoi reagimet e opozitës, dhe pasi tërhoqi vëmendjen, Rama shpërndau lajmin se i kishte kërkuar Prefektit të mos e miratonte këtë vendim.
Tani në skenë është rikthyer sërisht taksa e rrugës së Kombit, për të cilën Rama pas protestës në Kukës, e mbajti disa muaj në sirtarë, për ta rinxjerrë tani. Ndoshta sepse nuk ka pasur diçka më të fortë për të tërhequr vëmendjen. Ose se ndoshta nën mëngë i duhet të ruajë një apo disa Asa që mund t’i vlejnë më shumë pas datës 28-29 qershor, kohë kur Bashkimi Europian do të japë verdiktin për negociatat.
