Ku të investoni 1 milion dollarë

Katër investitorë me përvojë, ndajnë idetë e tyre se ku ndodhen mundësitë më të mira të investimit, në tregjet e sotme të paqëndrueshme.

Ndërsa tregjet amerikane mbeten të shqetësuara nga trazirat në sektorin bankar, ritmin e pasigurt të rritjes së normave të interesit të Rezervës Federale dhe një recesion i mundshëm, shumë investitorë po mbajnë rezerva më të mëdha parash.

Rritja e normave të interesit, i ka bërë obligacionet afatshkurtra dhe instrumentet e tjera të ngjashme me paranë, edhe më tërheqëse, por turbullirat e tregut po ngrenë pyetje se sa të qëndrueshme janë ato yield-e më të larta, ndërsa inflacioni vazhdon të reduktojë kthimet.

Për ata, që kanë kapacitetin për të marrë përsipër më shumë risk, ato para mund të përdoren në investime më fitimprurëse.

Për të zbuluar se ku mund të gjenden mundësitë në këto tregje të paqëndrueshme, katër ekspertë shpjeguan ide të ndryshme se ku mund të investohen 1 milion dollarë.

Jack Ablin, drejtues i investimeve, Cresset Capital

Të drejtat e muzikës

Ideja: Ne investuam në të drejtat e muzikës vitin e kaluar, dhe ju mund të kundërshtoni, duke thënë se të ardhurat nga blerja e të drejtave të muzikës, janë mjaft të pavarura nga cikli i biznesit.

Strategjia: Të drejtat e muzikës janë shumë të efektshme ndaj taksave. Honorarët e muzikës konsiderohen aktive jo-materiale dhe, ndryshe nga pasuritë e paluajtshme, zakonisht amortizohen gjatë 10 viteve duke përdorur metodën lineare*.

Honorarët e muzikës tregtohen si të ardhura fikse — ju keni këtë fluks monetar dhe kur normat/të ardhurat nga honoraret ulen, ju mund t’i amortizoni ato me normë më të ulët të vlerës aktuale. Por, ndryshe nga bonot me rendiment të lartë, numëruesi i kësaj lidhjeje, është mjaft i qëndrueshëm – njerëzit vazhdojnë të dëgjojnë muzikë.

Ne kemi investuar me një fond të quajtur Open On Sunday. Kur blemë – kjo ishte përpara rritjes së normës së interesit – mendohej për një kthim aktual rreth 8%. Nëse menaxheri mund të punojë meloditë në mënyrë efektive, kthimi mund të arrijë në 13% ose 13.5%.

Të drejtat e autorit dhe të muzikës janë bërë shumë të njohura dhe Sony ka paguar rreth 500 milionë dollarë për librin e Bruce Springsteen. Sony ishte i pozicionuar në mënyrë të përsosur – ata kanë një biznes muzikor, do ta vendosin muzikën në filma dhe madje edhe në videolojëra.

Beata Kirr, drejtuese e strategjisë të investimeve, Bernstein Private Wealth Management

Kreditë private

Ideja: Kredia private është bërë vërtet interesante. Bankat janë tërhequr nga kreditimi, për shkak të politikave rregullatore dhe kjo tendencë ka qenë e vazhdueshme pas krizës financiare të 2007-2008.

Strategjia: Kohët e fundit, ndërsa bankat vazhdojnë të tërhiqen, janë krijuar më shumë mundësi për klasën e aktiveve të kredisë private. Strategjitë janë kryesisht të disponueshme, ose për investitorët e akredituar, ose për blerësit e kualifikuar, kështu që nuk janë aq të disponueshme sa tregu i aksioneve dhe obligacioneve.

Por, është vërtet një kohë e mirë për të parë alternativat e bazuara në të ardhura dhe kredia private është ideja kryesore në këtë fushë. Sigurisht, duhet të jeni të kujdesshëm, por për shkak se presim një recesion të butë, nuk presim që rreziku i falimentimit të rritet materialisht. Kjo është një hapësirë vërtet interesante, veçanërisht në anën e lartë të strukturës së kapitalit.

Ne presim kthime një ose dyshifrore me kalimin e kohës, ku pjesa më e madhe vjen nga norma e interesit të kredive. Kreditë e reja të sotme janë më të lartat, që kemi parë në shumë kohë, rreth 11%.

Kthimet do të ndryshojnë shumë në bazë të levës dhe ku janë të pozicionuara kreditë në strukturën e kapitalit. Cilësia e nënshkrimit, është ajo që ka më shumë rëndësi për suksesin e kredisë. Kërkoni fonde, që kanë tejkaluar rëniet ekonomike dhe vlerësoni raportet e tyre kumulative të humbjeve.

Adrianne Yamaki, themeluese e Strategic Wealth Capital

Diversifikimi ndërkombëtar

Ideja: Unë besoj se diversifikimi i duhur përfshin, jo vetëm kompanitë e ndryshme sipas kapitalit ose stilit të tregut, por edhe përfaqësimin gjeografik. Një model i zakonshëm i investitorëve, është të kesh pak ose aspak ekspozim ndaj kompanive ndërkombëtare. Pikëpamja ime është se investitorët, që përqendrohen kryesisht në firmat amerikane, po heqin dorë nga shumë rritje nga kompanitë jashtë vendit.

Strategjia: Ka përfitime strukturore nga diversifikimi ndërkombëtar. Së pari, vendet shkëlqejnë në fusha të ndryshme, për arsye ekonomike dhe kulturore. Pesë kompanitë më të mëdha botërore publike të mallrave luksoze, janë të vendosura në Francë dhe Zvicër. Dy nga firmat më fitimprurëse të automobilave janë japoneze, dhe prodhuesi më i madh i gjysmëpërçuesve është kinez.

Në fund të fundit, ne investojmë në kompani, jo në vende, dhe kërkojmë fitime të forta kudo që janë. Së dyti, indekset amerikane kanë mbipeshë në sektorë të caktuar – S&P 500 është, për shembull, mbi 25 % teknologji. Pra, edhe në një indeks të gjerë me qindra zotërime, ju mund të mbartni rrezikun e sektorit, pa e kuptuar atë.

Kur hartojmë portofolet e kapitalit, jemi duke alokuar nga 30% deri në 40% në kompanitë jashtë vendit. Kjo përfshin firmat në tregjet e zhvilluara dhe ato në zhvillim. Ne përdorim indekset e brendshme për përfitimet e tyre me kosto të ulët, por kur investoj në tregjet në zhvillim, unë preferoj fondet e përbashkëta të menaxhuara në mënyrë profesionale.

Mark Perry, kreu i kërkimit të menaxhimit alternativ, Wilshire

Sipërmarrje në Europë

Ideja: Tregu europian i kapitaleve sipërmarrëse, është në një pikë imponuese e ciklit të tij jetësor dhe viti 2023 mund të jetë veçanërisht tërheqës. Wilshire ka parë nga afër zhvillimin e këtij tregu, duke përfshirë rritjen eksponenciale në aktivitetin e investimeve dhe daljet prej 1 miliardë eurosh gjatë dekadës së fundit.

Ky sukses ka përjetësuar një cikël të virtytshëm themeluesish, ka themeluar firma investimesh të nivelit të lartë dhe dalje të suksesshme nëpër qendrat e teknologjisë në zhvillim, nga Stokholmi në Barcelonë.

Strategjia: Kombinimi i përshpejtimit të ekosistemit, së bashku me tendencat laike në fusha të tilla si fintech, tregtia elektronike, inteligjenca artificiale, siguria kibernetike dhe softueri i ndërmarrjeve, jep një pamje bindëse për kthimin e pritur të investimit.

Historikisht, kapitali sipërmarrës europian, e ka përmbushur këtë pritshmëri, duke prodhuar kthime po aq të mira ose edhe më të mira, se fondet e kapitalit sipërmarrës në SHBA, ndërkohë që diversifikon rrezikun e portofolit kundrejt ekspozimit gjeografik.

Pavarësisht nga këto dinamika, Europa është një treg në thelb më pak konkurrues, në krahasim me homologët e saj të Amerikës së Veriut dhe Azisë. Ndërsa çmimi është në përgjithësi më i ulët për marrëveshje të ngjashme me teknologji ekuivalente, zhvendosja e tregut ka krijuar një pikë hyrëse veçanërisht bindëse. / Bloomberg

* Metoda Lineare e Amortizimit: metoda më e përdorur në shoqëri, e cila nënkupton amortizimin konstant me kalimin e kohës, si pasojë e pjesëtimit të vlerës së mallit ose aktivit me jetëgjatësinë e tij./Monitor/