Rifreskimi i PD-së, por, jo me shkop bejzbolli!
Është legjitime që sot çdo demokrat të mendoj një rrugëzgjidhje nga situata në të cilën ndodhet Partia Demokratike; Është legjitime që një grup demokratësh të jenë të një mendje se fajtori i humbjes në zgjedhjet e 11 Majit ka një emër; Është legjitime që një grup demokratësh të jenë të një mendje se PD duhet rifreskuar sepse lidershipi aktual ka dështuar dhe fajet mund ti ketë si Kryetari Sali Berisha, ashtu dhe Sekretari i Përgjithshëm, Flamur Noka; Por, kur ky grup inicohet dhe drejtohet nga njeriu që rifreskimin tashmë e kishte projektuar me shkop bejzbolli dhe dështoi, atëherë kjo iniciativë nuk është thjeshtë një takim kafeje në një hotel luksoz, as një nismë për krijimin e një partie nga Ervin Salianji, por, e gjitha kundërmon vetëm erë Brave me ndryshk!
Nëse kësaj i shtojmë amnistinë në ligjërimin politik që ky grupim i bëri rizgjedhjes së Kryetarit të Grupit Parlamentar, Gazment Bardhi, dhe, Nëkryetarit të Parlamentit, Agron Gjekmarkaj, edhe pas dështimeve si drejtues politik në qarqet Fier përkatësisht Lezhë, kundërmimi bëhet shumë më shqetësues!
Dhe, qershia mbi këtë shqetësim vjen me nxitimin e mediave nën kontrrollin e Edi Ramës për të raportuar lajmin mbi revolucionin në PD kundër Sali Berishës dhe Flamur Nokës, nga një grupim që do të rifreskoj Partinë Demokratikë; Propagandë kjo komuniste që vazhdoi edhe të premten e 28 Nëntorit duke mo s kursyer as “Ditën e Flamurit” për t’i kushtuar vemendje të jashtëzakonshme këtij takimi që lidershipi aktual i PD e cilësoi si “takim kafeje”, deri te mundësia e krijimit të një partie të re “nga njerëzit më të votuar në PD”!
Sepse, takime kafeje pa fund kishte sponsorizuar mjaft Edi Rama për të përçarë PD-në, ashtu si dhe formim të partive të reja, jo një po tri të tilla, shumë demokratë përfunduan nëpër biruca për të mbrojtur dinjitetin e Partisë Demokratike, menduan se Rithemeluan PD-në dhe një ditë të bukur iu tha ti mbyllën hundët nga kundërmimi i qelbësirave pasi që do fillonte një procesi i ri në parti, që dikush e pagëzoi Bashkim; Dhe, me hundë të mbyllura, pa kërkuar njeri falje as dhe një analizë se si ndodhi e gjithë kjo gjëmë deri te “Bashkimi”, nxituan të futen në zgjedhje parlamentare!
Ashtu siç nxituan në vitin 1991 për të marrë pushtetin, duke gatuar politikën e djathtë në një kazan me të përndjekur dhe pronar të plaçkitur nga komunistët, hetues, prokurorë dhe gjyqtarë që varën në litar shqiptarë pa hesap, me idenë se duhet të shikohet nga e ardhmja, kështu u futën në selinë e Partisë Demokratike pas 8 Janarit me idenë se duhet harruar gjakderdhja ndër demokratë duke shikuar nga e ardhmja!
Ja, pra, që nuk duhet shikuar nga e ardhmja pa e kuptuar se si përfunduan demokratët në Lanë nga gazsjellësi i demokratëve; Kush urdhëroi zhdukjen e blindave pa ruajtur qoftë dhe një copë blindi që sot do të ishte një obelisk për t’i kujtuar viktimës, agresorit dhe çdo demokrati në të ardhmen, se çfarë ndodhë kur Edi Rama futet në shtëpinë e demokratëve i paftuar; Ose, nëse është ndryshe edhe pasi ka paguar çmimin e duhur!
Dhe, në fund, vijmë te lideri i vetëshpallur i rifreskimit më të ri të Partisë Demokratike, Ervin Salianji, që të gjithë shqiptarët e panë me shkop bejzbolli në dorë, 8 Janarin e vitit 2022!
Po, shqiptarët u tronditën kur panë njërin nga krerët e Partisë Demokratike me shkop bejzbolli në dorë, por askush nuk pa edhe 34 shkopa bejzbolli të tjerë që ishin brenda në seli, që edhe mund të mos jenë sjellë nga Ervin Salianji, por, që ky skenar makabër duhej sqaruar dhe bërë publik pavarësisht se cila kokë e sëmurë e ka bërë drurin gati për ti “mirëpritur” demokratët që mendonin ndryshe!
Dhe, ashtu si në vitin 1991, edhe pas krimit të vitit 2022, gjithçka u shua në emër të “bashkimit”!
Në fund, a ka nevojë Partia Demokratike për rifreskim?! Pa dyshim që po, por këtë nuk e bënë shkopi i bejzbollit, as shpërfillja e zërit ndryshe, por fillimisht respekti i të gjithë atyre që sakrifikuan pse sot ka Parti Demokratike dhe mohimi i drejtimit të strukturave PD-së të gjithë atyre që guxuan të çojnë dorë mbi demokratë!
Rifreskimi nuk bëhet përmbi myk! Nëse Partia Demokratike nuk pastron mykun nga selia e vetë, demokratët kot që ngrohen nga raportimet e mediave që Edi Rama i ka nën kontroll, me një revolucion që po ndodhë në PD, sepse nuk ka gëlqere në botë as bojë gjermani që e pastron PD-në nga myku i shtresuar i Sigurimit të Shtetit!
