Kurti: 2023, vit i ekonomisë, arsimit e barazisë

Angazhimi, puna dhe rezultatet në vitin 2022 duhet të jenë minimumi i angazhimit, punës dhe rezultateve të vitit 2023, tha sot Kryeministri i Kosovës, Albin Kurti, në mbledhjen e qeverisë, për vitin të cilin e cilësoi si vit të zhvillimit ekonomik, arsimit, shëndetësisë, ushtrisë, sigurisë dhe barazisë.

“Le ta vazhdojmë pra garën me vetën, me bindjen se potenciali ynë është më i madh se sa aktualiteti që e kemi. Ia kemi filluar mbarë, që në ditën e tretë të vitit, e para se të mbërrijmë në gjysmën e mandatit tonë, realizuam premtimin për shtesa për të gjithë fëmijët nën moshën 16 vjeçare. Kurse sot, në javën e dytë e në mbledhjen e parë për këtë vit, kemi në rend të ditës miratimin e Projektligjit për Investime të Qëndrueshme. Nëpërmjet tij, synojmë që të mbrojmë dhe tërheqim investimet, vendosim bazën për të përkrahur industrinë vendore dhe punësimin e qëndrueshëm, të fuqizojmë rininë dhe gratë, si dhe të thellojmë bashkëpunimin me mërgatën tonë,” tha Albin Kurti duke folur për të ardhmen që synojnë.

“Me mbrojtjen, ekonominë, demokracinë dhe shtetin ligjor në binar, si dhe me buxhetin për këtë vit tashmë të miratuar në Kuvend, në vitin 2023 kemi hyrë me më shumë siguri, me më shumë besim për të ardhmen, të cilën e synojmë dhe të ardhmen, të cilën e meritojmë”.

Me këtë rast Kryeministri i Kosovës u zotua se zelli dhe angazhimi ynë për të realizuar programin qeverisës dhe për të jetësuar reformat e thella e transformuese nuk do të pushojë as edhe për një ditë.

“Viti 2023 do të jetë më shumë për arsimin, shëndetësinë, ushtrinë, bujqësinë, ekonominë e kulturën, vit i edukimit, shëndetit, barazisë, drejtësisë, mirëqenies, sigurisë, prodhimit dhe zhvillimit ekonomik e shoqëror, vit i të gjithë qytetarëve dhe për Republikën. Sfidave do t’iu japim përgjigje. Vështirësitë do t’i kthejmë në mundësi,” tha Kryeministri i Kosovës, Albin Kurti i bindur:

“Përballja me këto vështirësi do të na definojë si popull, si shoqëri e si shtet”, ka nënvizuar Kurti.

Ndryshe, në mbledhjen e sotme, Qeveria ka ndarë 70 mijë euro për librin që flet për Masakrën e Reçakut të William Walker.