Kurti dhe Osmani, nderim Ish-Presidentit Rugova dhe Demaçit
Për nder të 12-vjetorit të pavarësisë së Kosovës, Kryeministri Albin Kurti dhe Kryetarja e Parlamentit, Vjosa Osmani, bënë homazhe dhe vendosen kurora lulesh te varri i Ish-Presidentit Ibrahim Rugova, dhe te varri i veprimtarit të çështjes kombëtare Adem Demaçi.
Kurti dhe Osmani thanë se veprimtaria e liderit historik të LDK-së për lirinë dhe pavarësinë e vendit do të vlerësohet gjithmonë.
“Sot tek sa shënojmë dhe festojmë përvjetorin e 12 të shpalljes së e pavarësisë, kujtojmë presidentin e parë të Kosovës Ibrahim Rugovën, të zgjedhur me votë popullore me 24 maj të vitit 1992, një dekadë më vonë më 4 mars të vitit 2002 në Kuvendin e Kosovës doktor Rugova rizgjidhet sërish president i Kosovës kësaj radhë president i parë në Kosovën e çliruar. Në një ditë si kjo ne vlerësojmë përpjekjen insistuese dhe institucionale, angazhimin politik për liri dhe pavarësi,” u shpreh Kryeministri Albin Kurti ndërsa Kryeparlamentarja Vjosa Osmani shtoi se Presidenti Rugova ishte ideator i projektit të shtet formimit tonë.
“Ishim këtu për të nderuar kontributin e presidentit historik Ibrahim Rugova, në ndërtimin e themelit të shtetit tonë si ideator i projektit të Kosovës shtet të pavarur dhe sovran dhe natyrisht kontributin e tij në bashkimin e të gjithë shqiptarëve në Kosovë rreth kësaj ideje, dhe sublimimit dhe artikulimit të qartë të popullit tonë për liri e pavarësi e nderojmë sot natyrisht kontributin e tij dhe të gjithë bijve e bijave të cilët u bashkuan rreth lëvizjes së madhe të shqiptarëve për ta artikuluar këtë vullnet të qartë, këtë vullnet për liri dhe pavarësinë tonë,” tha Osmani.
Kurti: Demaçi ishte i gjithkujt përveç i vetes së tij
Me rastin e 12-vjetorit të shpalljes së pavarësisë së Kosovës, Kryeministri Albin Kurti dhe Kryetarja e Parlamentit, Vjosa Osmani, kanë bërë homazhe edhe te varri i veprimtarit të çështjes kombëtare Adem Demaçi, ku vlerësuan lart sakrificën e Demaçit për shtetin e Kosovës dhe çështjen kombëtare.
Kryeministri Albin Kurti tha se Adem Demaçi si intelektual, shkrimtar dhe i burgosur politik ishte frymëzim e inspirim i brezave të tërë.
“Si shkrimtar dhe intelektual i ri, si i burgosuri politik, me vuajtjet më të gjata Adem Demaçi frymëzoi dhe inspiroi breza të tërë të veprimtarëve dhe luftëtarëve si askush tjetër. Në 12-vjetorin e shpalljes së pavarësisë së Kosovës, ne përulemi para jetës, veprës dhe luftës së tij, të cilat ai asnjëherë nuk i ndau nga njëra-tjetra, pra ishte i gjithkujt, përveç i vetes s ë tij, dhe të gjithë ne i kemi aq shumë borxh.”
Ndërsa Kryeparlamentarja Vjosa Osmani foli për jetën dhe veprën e veprimtarit Adem Demaçi në luftën kundër regjimit serb.
“Ne, sot nderojmë Adem Demaçin një prej veprimtarëve simbol të çështjes shqiptare që luftoi nëpërmjet sakrificës së tij okupimin dhe regjimin serb për vite me radhë. Ai dëshmoi se si liria individuale sakrifikohet në të mirë kolektive. Ai e vendosi lirinë e popullit të tij para çdo lirie dhe interesi tjetër. Ne e nderojmë sot atë siç i nderojmë të gjithë veprimtarët shqiptarë, të cilët rezistuan duke sakrifikuar veten dhe nuk u dorëzuan kurrë para një regjimi që kishte për qëllim të shkatërrojë përfundimisht popullin tonë,” tha Osmani.
