Kurti me kryediplomatin grek, zbatim të marrëveshjes pa vonesa
Në ditën e dytë të pjesëmarrjes në Forumin Ekonomik në Delphi, Kryeministri i Kosovës, Albin Kurti takoi ministrin e Punëve të Jashtme të Greqisë, Nikos Dendias, të cilin e falënderoi për përkrahjen e vazhdueshme të Athinës zyrtare ndaj Kosovës në proceset integruese.
Marrëdhëniet dypalëshe ndërmjet Kosovës dhe Greqisë dhe mënyrat se si ato mund të avancohen më tej, veçanërisht në rrafshin ekonomik, teksa shkëmbimet tregtare dhe investimet e huaja kanë shënuar rritje viteve të fundit, ishin pjesë qendrore e takimit, njofton Qeveria e Kosovës.
“Nevoja e zbatimit të plotë, pa vonesa dhe të pakushtëzuar të Marrëveshjes Bazë dhe Aneksit të Zbatimit me Serbinë dhe pritjet e takimit të nivelit të lartë politik me 2 maj në Bruksel, nën ndërmjetësimin e Bashkimit Evropian,” ishin temë diskutimi e këtij takimi ashtu si dhe zhvillimet e fundit në vend dhe rezultatet dhe rëndësinë e mbajtjes së zgjedhjeve në katër komunat veriore të Kosovës të dielën e javës së kaluar.
Ndryshe, takimi i sotëm i Kryeministrit Kurti me ministrin Dendias ishte i dhjeti në dy vite. Muajin e kaluar, ministri grek Dendias kishte vizituar Kosovën, që ishte vizita e tij e gjashtë zyrtare në Kosovë.
