Kush e shkeli “Chatam Haus” dhe nxorri në pazar Albin Kurtin?!

Debati për Ballkanin Perëndimor në kuadër të Konferencës së Sigurisë në München përkundër natyrës “Chatam Haus”, që nënkupton se pjesëmarrësit nuk kanë të drejtë të publikojnë detaje nga takimi, përfundoi me një ekzaltim shqiptar të paparë.

U konsiderua arritje gazetareske filmimi me celular i debatit i cili përfundoi në rrjetet sociale dhe patriotizëm shekullor ajo që Kryeministri i Kosovës, Albin Kurti i tha Presidentit të Serbisë, por zhvillimi i ngjarjeve dëshmoi se të ekzaltuar ishin ata që nuk i kishin besuar Kurtit dhe shkelja e “Chatam Haus” me ose pa dashjen e Albin Kurtit, i ra kokës vetëm atij!

Në debat Albi Kurti u fut i humbur, me një tradhëti që kishte bërë Hashim Thaçi me marrëveshjet e autostradës dhe hekurudhës që u nënshkruan pa dijeninë e Kurtit dhe në prani të Dërguarit të Presidentit Trump për dialogun Kosovë-Serbi, Ambasadorit Richard Grenell, dhe doli i shpallur patriot nga ata që nuk i besuan dhe nuk i besojnë Kryeministrit Kurti por që kishin tashmë për publikun, videon e famshme e cila u arrit me tradhëtin e radhës, autori i së cilës është lehtësisht të zbulohet nga pozicioni i syrit të kamerës që ka filmuar.

Të jeshë patriot më i madh se Hashim Thaçi dhe Edi Rama nuk është ndonjë hata, por të humbasësh besimin ndërkombëtar nga një tryezë me dyer të mbyllura, është më shumë se hata dhe këtë duhet ta analizojnë bashkëpunëtorët e Albin Kurtit pas takimit të parealizuar me Sekretarin e Shtetit, Mike Pompeo.

Po çfarë ndodhi vërtetë në këtë histori tradhëtishë dhe cili është bilanci i publikimit të përplasjes së Kurtit me Vuçiçin, qartësinë e tij për Mini Shengenin dhe fushatës idiotike me “Albinin Patriot”, kur ai i tillë është që nga viti 1998 dhe nuk ka arsye ti bindë injorantët, që për fat të keq, ca prej tyre kanë marrë edhe lapsin në dorë.

Ndryshe, portali Indeksonline, njëri nga armiqësorët me personalitetin dhe politikanin Albin Kurti, është njëri nga ata që sjellë fjalimin e plotë të përkthyer në shqip:

Djersa e Vuçiçit dhe sikleti i Ramës

Presidenti i Serbisë, Aleksandar Vuçiç doli nga debati për Ballkanin Perëndimor në kuadër të Konferencës së Sigurisë në München plotësisht i djersitur ndërsa iu drejtua serbëve përmes televizionit publik serb, RTS. Tha se e mbrojti shtetin serb dhe iu përgjigj provokimeve shqiptare, debatit të ashpër dhe të pavërtetave që u sollën aty, por meqë kemi të bëjmë me një takim me dyer të mbyllura, sipas parimit “Chatam Haus”, ai u përmbajtë.

Pasoi një deklaratë e jashtëzakonshme e Kryeministrit Albin Kurti ku sqaroi nervozizmin e Vuçiçit dhe sërish për shkak të “Chatam Haus” u përmbajt.

“Unë nuk jam takuar me Vuçiçin. Kemi qenë në një tryezë të rrumbullakët, ku kanë qenë të ftuar të gjithë udhëheqësit e Ballkanit Perëndimor. Ai (Vuçiç) ndjeu shumë presion për shkak të asaj që thashë. Pastaj pasoi reagimi i tij me nervozizëm,” tha Albin Kurti për RFE duke saktësuar se nuk dëshiron të japë detaje ndërsa iu referua rregullave të organizatorit të panelit, që nuk lejojnë të bëhen publike pikëpamjet e pjesëmarrësve, Chatam House Rules.

Shumë shpejtë u zbuluan arsyet e djersëve të Vuçiçit por njohësit e Kryeministrit të Kosovës, Albin Kurti, nuk shohin ndonjë artikulim të ri dhe as me protagonist të ri, vetëm se në tryezë kishte përballë Aleksandar Vuçiçin. Kjo nuk do ta përfshinte në djersë Vuçiçin, sikur përballë të mos kishte Edi Ramën dhe Hashim Thaçin, që ishin në siklet, por Presidenti i Serbisë mendoi se për këtë ishin kujdesur miqtë e tij të Mini Shengenit.

“20 vite më parë, gati të gjithë ju, na ndihmuat neve që të çlirohemi nga Serbia. Unë mendoj se tash është koha që Serbia të çlirohet nga Kosova. Pas çlirimit të Kosovës nga Serbia, na duhet çlirimi i Serbisë nga Kosova. Ne u çliruam sepse ishim të okupuar, ndërsa Serbisë i duhet çlirimi sepse Kosova është një kurth për Serbinë. Sa më shpejtë që Serbia të çlirohet nga Kosova, do të jetë më mirë për te dy palët dhe për të gjithë Ballkanin Perëndimor,” tha Albin Kurti pa pasur nevojë që kjo të delte në publik, por ja që ndodhi.

Të gjithë ata që njohin Albin Kurtin do ta besonin sikur edhe të rrëfente momentet e dialogut, por video dhe manipulimi i masave bënë të veten me ndihmën e rrjeteve sociale për ti bërë më shumë dëm se sa reklamë Kryeministrit Kurti i cili sapo ka shkelë në nivelet e larta të politikës.

Fat të ngjashëm kishin tri parime për dialogun Kosovë-Serbi.

“Le të themi duhet të jenë tri parime në këtë dialog. E para është jo marrëveshje pa dialog. E dyta jo dialog me harta dhe e treta është jo harta me president përreth,” ishte brilant në tryezë Albin Kurti duke sjellë edhe buzëqeshje të sikletshme në buzët e Edi Ramës dhe djersë tek ideatori i Mini Shengenit, Aleksandar Vuçiç, por jo dhe respekt tek ndërkombëtarët prezent kur e kuptuan se i gjithë ky debat kishte përfunduar në mediat shqiptare.

“Chatam Haus”  

Debati rreth Ballkanit Perëndimor nuk është menduar si vendimmarrës për fatin e askujt, aq më pak konfliktit Kosovë-Serbi, por ishte një arenë e mirë promovimi për Kryeministrin e ri të Kosovës, Albin Kurti.

Ata që e kanë menduar si moment përfitimi për të bindur kundërshtarët ose për ti rritur votat njeriut më të votuar në Kosovë, kanë probleme me veten.

Albin Kurti para Konferencës së Sigurisë në München ishte një fenomen interesant për ndërkombëtarët por sot ndonëse dikush e mendon patriot më të madh, ai është i dyshimtë për ndërkombëtarët. E vërteta e videos nuk është thjeshtë shkelje e parimeve “Chatam Haus” ajo do të zbardhet ose ndoshta është zbardhur tashmë, por efekti i madh negativ që ka prodhuar tek partnerët është shumë më i madh se sa ca shkrime dhe lëvdata idiote patriotike që na tregojnë se sa patriotë na qenka Albin Kurti.

Të gjithë ata shqiptarë që i besuan Albin Kurtit para Konferencës së Sigurisë nuk u duhej as edhe një video për tu bindur se Kryeministri i ri i Kosovës do ta përfaqësoj shtetin pak më mirë se Ramush Haradinaj dhe shumë më mirë se Hashim Thaçi.

Të gjithë ata ndërkombëtar që i besuan pak Albin Kurtit para Konferencës së Sigurisë, nëse rezulton se video është produkt i qeverisjes së re, do ta kenë problem takimin dhe marrëveshjen kokë më kokë në të ardhmen. Dhe, sikur e gjitha të rezultoi një flluskë e Hashim Thaçit dhe Edi Ramës për ta nxjerr Albin Kurtin të pabesë, Kryeministri i ri i Kosovës në takimet e ardhshme që do të zhvilloj me partnerët e rëndësishëm ndërkombëtar, duhet të shkoj pa xhepa dhe pa injorant rreth vetes që kanë filluar si shtohen pas ardhjes në krye të qeverisë.