Kush mbështet pushtetin e Edi Ramës me NON GRATA, vetëm pse s’quhen Sali Berisha?!
Kur Sekretari amerikan i Shtetit, Antony Blinken, i bëri realitet dëshirën mbi dyvjeçare të Kryeministrit Edi Rama pasditen e 19 Majit të vitit 2021, dhe shpalli Ish-Presidentin Sali Berisha person NON GRATA, demokratët shqiptarë u shkundën mirë ndërsa të tjerëve u doli përpara mirazhi i fundit i njeriut që nuk po e lëviznin dot nga politika, si dhe fundi i lukunisë së kriminelëve socialistë që ndonëse NON GRATA vazhdonin të ishin pjesë e pushtetit të Edi Ramës!
Të shkundurit e morën veten pasi u qetësuan ujërat e trazuar ndërsa e gjithë lukunia e kriminelëve socialistë të shpallur NON GRATA e pashqetësuar vazhdoi punën në rolin vendimtar për përcaktimin e fatit të pushtetit legjislativ, ekzekutiv, dhe së fundi edhe pushtetit lokal duke zbuluar shumë shpejtë kallauzin e veprimit politik në këto ujëra të trazuara:
Majfton të mos quhesh Sali Berisha!
Shqiptar NON GRATA, ku qëndron problemi këtu?!
Shqiptar NON GRATA ishte një damkë e rëndë për çdo politikan aktiv, madje dhe ndjesia e tyre duke vepruar në një ambient puroamerikanë i bënte ata sikur janë të prekur nga kanceri dhe ishin në pritje të vdekjes së tyre politike!
Por, mosprodhimi i figurave të reja nga liderët politikë shqiptarë dhe zhvillimet e reja gjeopolitike bën që gjithë këta të damkosur të mos e kenë të domosdoshme kimioterapinë për këtë kancer, madje të jenë të domosdoshëm për politikën amerikane si në Maqedoni të Veriut dhe në Kosovë; Dhe, kur bëjnë politikë Edi Rama dhe Lulzim Basha, ti nxjerrin aq shumë zbuluar sa sot është shumë e qartë se mjafton të mos quhesh Sali Berisha!
Në vitin 2001 askush nuk e kishte menduar se Menduh Thaçi do t’i duhej amerikanëve si lider politikë për të krijuar një qeveri në Maqedoni të Veriut që ishte e domosdoshme për stabilitetin, e lëre më për zgjedhjet e fundit që zhvillohen në 8 Maj 2024 kur duhet të përmbysin rezultatin e ngushtë të sondazheve duke u futur në kaolicion edhe me Ali Ahmetin aq shumë të luftuar, vetëm e vetëm të mos instalohet politika e Albin Kurtit në këtë shtet që vazhdon të pësoj goditje tektonike nga të gjithë, si nga Beogradi, Athina e Sofja, tashmë edhe nga Vetëvendosja!
Nuk dihet pse Albin Kurti u kalit me shkronja kapitale në politikën ndërkombëtare, por për rrëzimin e tij sërish u futën në koalicion qeverisës, politikanë që tashmë kishin mbi supe damkën NON GRATA! Fatmir Limaj as sot nuk e ka të qartë pse u shpallë NON GRATA, por për të pagëzuar Ramush Haradinajn kryeministër, vota e partisë së tij ishte e domosdoshme meqë kjo betejë po lëvizte nëpër fije të perit!
Dhe, Albin Kurti u shkarkua!
Duke i mëshuar korrupsionit dhe minimit të demokracisë, brendi i damkës NON GRATA përçoi një mesazh me qartësi ndryshe tek qytetarët e Kosovës sa dhe fibra optike nuk do ta përçonte më mirë!
Me ose pa NON GRATA, liderët e partive politik në Kosovë nuk arritën të ngadhnjejnë në zgjedhjet e radhës, dhe në analizën e fundit, sot, kjo është e qartë se vetëm meritë e Albin Kurtit nuk është, sepse vetëm ai ishte personi që nuk ankohej nëpër ambasada se do të fitoj në zgjedhje dhe po pengon proceset!
Duke pasur këto dy modele, diplomatët ndërkombëtar ngatërruan sërish kimioterapinë, madje aq shumë sa ajo po i shërben pikërisht njeriut që u damkos me NON GRATA ndonëse e ka ndjesinë shumë më të rëndë se të prekurit nga një kancer që nuk ka ilaç.
Saliu NON GRATA!
U fik politikisht duke soditur me mburrje produktin e tij politik, Lulzim Basha, zbavitej me “qytetarin dixhital” pa e kuptuar se edhe si tillë konsiderohet pengesë e madhe për Kryeministrin e ri Edi Rama për të qeverisur, ndërsa për pasardhësin e tij në PD, për të drejtuar partinë!
700 ditë para kumtit, kur Edi Rama e bëri të qartë se do të shpallet NON GRATA, askush mbi këtë tokë nuk e imagjinonte duke përfshirë këtu edhe ideatorët e kësaj damke, se ky vendim do ta ndezte me një flakë të paimgjinueshme njeriun që vetëm sa nuk ishte fikur plotësisht!
Sali Berisha u shpall NON GRATA, u bë pjesë e ligjërimit politik të Edi Ramës dhe atyre që i shërbenin, duke përfshirë këtu edhe Lulzim Bashën që e konsideronte trofe PD-në pa Saliun, por, efekti i vetëm që dha në politikën shqiptare ishte kthimi i Saliut në politikën aktive dhe ndërprerja e dërdëllisjes së qytetarit dixhital!
A do të rikthehej Sali Berisha NON GRATA kaq fuqishëm në politikë, në këtë mënyrë, sikur Edi Rama të mos e kishte të domosdoshme aleancën e Vangjush Dakos dhe Tom Doshit, që të dy NON GRATA, për fitoren e fundit parlamentare dhe atë lokale në Durrës përkatësisht Shkodër, kjo nuk mund të thuhet me siguri!
Por, vendimtar në zhvlerësimin e damkës NON GRATA ishte pikërisht ligjërimi politik i Edi Ramës për Antiamerikanin Sali ndërsa vetë mbante në krah për të siguruar fitoret në Qarkun Durrës e në veçanti Shkodër, dy antiamerikanët real, Dakon dhe Tomën, pa të cilët si votimi i ligjeve me 2/3, Aktet normative ashtu dhe fitorja në Shkodër, as në ëndërr nuk do honepsej!
Sot, kur Saliu NON GRATA konsiderohet nga çdo shqiptar si vepër e Edi Ramës po aq sa gunga flakdhënëse në Sheshin Skënderbe në Tiranë, Kryeministri e ka fshirë nga fjalori i tij këtë damkë! Jo pse i dha fitoren atij në qarqet Durrës dhe Shkodër, por sepse e kuptoi që Skandalin McGonigal mund ta fshijë nga ekranet televizive me një sms, por korruptimi i agjentit të FBI për të bërë hetime politike për Shqipërinë nuk ka shfajësuar vetëm Saliun NON GRATA dhe akuzat e tij për gjyqet e korrupsionit dhe vulës, por ka arsyetuar mbi 500 mijë vota që shqiptarët i besuan Saliut në zgjedhjet lokale!
Në fund, postulati i Edi Ramës “shqiptar NON GRATA në pushtet, vetëm mos u quaj Sali Berisha” përveç se rezultoi si dështim, dëshmon se Kryeministri aktual përkundër komplimenteve që merr nga ndërkombëtarët, ai ende nuk e ka kuptuar as çka është politika, as hesapi dhe as hanxhia!
Zhbërja e plotë e Saliut dhe Partisë Demokratike përmes gjyqësorit vetëm pse ka në krye një politikan NON GRATA mund ta shpërbëjë PD-në duke i pamundësuar pjesëmarrje në zgjedhjet parlamentare të vitit 2025 ashtu si edhe Llullit të tij të dashur duke i djegur afatet, por, edhe mund të ketë në garë një rival për Kryeministër që nuk quhet Sali Berisha dhe që nuk është NON GRATA!
Çfarë do shohin shqiptarët pastaj?! Prap korrupsion, prap një Zyrtar të FBI, prap pazar me tokën e Kosovës, prap afrikanë në Shëngjin… çfarë mendon Edi Rama, prap do t’i besojnë?!
