Kushi: Kontroll të kritereve të ligjshmërisë për universitetet, më pas përcaktojmë formulën për rankimin kombëtar

Të gjitha universitetet do ti nënshtrohen një kontrolli  të kritereve të ligjshmërisë, pra nëse janë duke funksionuar në zbatim të plotë të ligjit të arsimit të lartë, bëri me dije ministrja e Arsimit Evis Kushi gjatë takimit me rektorët. Dhe hapi i radhës është përcaktimi I një formule për rankimin kombëtar të universiteteve, përcaktimin e të gjithë treguesve në bazë të të cilëve do të vlerësohet cilësia e arsimit.

“Në lidhje me rankimin kombëtar ne mendojmë të ngremë një grup pune të përbashkët, me ekspertë të ministrisë, përfaqësues të universiteteve dhe nga bordi I akreditimit për të përcaktuar fillimisht cilët do të jenë treguesit, çfarë peshe do të kenë këta tregues në renditje, e më pas për të përcaktuar metodologjinë se si do të bëhet vlerësimi. Por së pari duhet të përcaktojmë se cila do të jetë kjo formulë, dhe më pas do të marrë kohën e vetë procesi që do ti nënshtrohet secili universitet këtij vlerësimi për të pasur një renditje, e cila do të jetë edhe e përgjithshme, por edhe sipas komponentëve që do të përcaktojmë. Ne do të zgjedhim një formulë që do të na japë në mundësinë për të bërë renditjen edhe sipas komponentëve të caktuar, mund të jetë e veçantë për privatët dhe publikët.

Ajo që do të vendosim bashkërisht është komponenti i ligjshmërisë. Renditja e universiteteve konsiston në cilësinë e universiteteve por ndërkohë ka ardhur momenti të bëjmë edhe një kontroll të kritereve të ligjshmërisë për universitetet, qoftë për privatët qoftë edhe për publikët. U bë kohë e gjatë që një proces i tillë nuk është ndërmarrë nga ministria. Dhe ky do të jetë hapi I parë, pra ne duhet të sigurohemi që universitetet tona performojnë bazuar dhe ne respekt të plotë të ligjit, janë të konsoliduara dhe që ligji i arsimit të lartë zbatohet siç duhet. Dhe më pas hapi tjetër është pikërisht rankimi i universiteteve”.

Renditja e Universiteteve të vendit në hartën globale dhe pas një kohe shumë të gjatë pas reformës është e papranueshme, deklaroi kryeministri Edi Rama.

“Pavarësisht se duhet akoma më shumë shfrytëzimi i autonomisë, çështja që shtrohet sot është që pavarësisht përparimit real dhe konkret pikërisht pse raporti ynë me të ardhmen është i zhdrejtë, renditja e Universiteteve të vendit në hartën globale dhe pas një kohe shumë të gjatë pas reformës është e papranueshme. Por lajmi i mirë është se është një renditje që nuk pasqyron kapacitetet. E solla shembullin e aksesit të fondeve evropiane madje ne ato projekte në të cilat universiteti i Tiranës ka aksesuar fondet evropiane kemi disa projekte ku është lider universiteti i Tiranës. Njohja e lidershipit të universitet i Tiranës, flet që kapacitetet ne i kemi shumë më të mira sesa tregojnë pamja dhe niveli i rankimeve tona shumë poshtë. Prandaj gjëja që kemi vendosur është që të merremi shumë seriozisht me këtë aspekt. Të fillojmë ti ndjekim një nga një kushtet që duhen përmubushur që ndonjëherë janë kushte minimale për të pasur një rankim serioz”.

Viti i ri akademik filloi më 17 tetor, por mësimi nuk është zhvilluar pasi prej dy ditësh një pjesë e pedagogëve të universiteteve publike kanë bojkotuar mësimdhënien, pasi i kanë drejtuar qeverisë një sërë kërkesash./Monitor/

Kërkesat e pedagogëve:

-Rritja e pagave për pedagogët dhe stafin ndihmës

-Rritja e financimit për kërkimin shkencor

-Rivendosja e shtesave mbi pagë për ‘Dëshmëri shëndeti në punë’

-Rritja e shtesës mbi pagën për vjetërsinë në punë

-Rritja e pagesës së orëve të ngarkesës suplementare

-Rivlerësimi i orës mësimore pasi ka zbritje prej 50% të pagesës së orës mësimore si rezultat i mosfierencimit të orës mësimore të leksionit.

-Rishikimin e tatimit prej 23% mbi pagesën e ngarkesës suplementare

-Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.

-Të bëhet transparencë mbi buxhetin dhe të ardhurat e universitetet publike.