Largimi i Dvoranit/ Zbardhen debatet në KLGJ , pse s’mund të jetë më gjyqtar!

Me 6 vota për dhe 3 vota kundër, Këshilli i Lartë Gjyqësor vendosi që të largonte Ardian Dvoranin nga pozicioni si gjykatës në Gjykatën e Lartë, 7 vite pasi zyrtarisht i kishte mbaruar mandati.

Kështu, Dvorani, pas këtij vendimi humbet edhe pozitën e tij si kryetar i Këshillit të Emërimeve në Drejtësi, që e kishte fituar këtë vit për të dytin vit radhazi. Por gjatë mbledhjes së Këshillit të Lartë Gjyqësor nuk janë shmangur diskutimet, teksa ata që votuan kundër shkarkimit shtruan motivet se përse Dvorani duhej të vijonte të qëndronte në krye të Gjykatës së Lartë dhe rrjedhimisht edhe në atë të KED-it.

Gjatë mbledhjes, relatorja e çështjes, Marsela Shehu, deklaroi se Ardian Dvoranit i ka përfunduar detyrimi kushtetues për të pritur pasardhësin e tij dhe se qëndrimi në detyrë mbi afate rrezikon parimet e Kushtetutës. Nga ana tjetër, Brikena Ukperaj deklaroi se në asnjë dispozitë nuk gjen parashikim të tillë, që zoti Dvorani do të zëvendësohet nga anëtari i parë, i dytë apo i tretë.

Sipas saj, detyrimi i Dvoranit për të ndërprerë detyrën është kur vjen anëtari i katërt. Por edhe anëtarët e tjerë të Këshillit që ishin pro shkarkimit shtjelluan qëndrimet e tyre. Sipas Alban Toros, KLGJ do duhej të shprehej për sa i përket konstatimit për mbarimin e detyrimit të Ardian Dvoranit për të qëndruar në Gjykatën e Lartë.

Ai tha se detyrimi i Ardian Dvoranit për të qëndruar në Gjykatën e Lartë nuk ka mbaruar, por mbaron në momentin e zgjidhjes së anëtarit të katërt, që vjen nga radhët e juristëve të spikatur. Sakaq, për anëtaren e KLGJ-së, Brunilda Kadi, në datën 13 mars, kur edhe është betuar gjyqtari i parë përpara Presidentit, Dvoranit i ka mbaruar jo detyrimi, por e drejta dhe gjithashtu edhe mundësia që të qëndrojë në detyrë dhe se ai nuk mund të vijojnë ushtrimin e asaj detyre.

“Të drejtën për t’u caktuar në një pozicion Apeli, mendoj se e kanë vetëm ata që i plotësojnë kriteret për të qenë në atë pozicion. Unë do të kërkoj që të verifikohen edhe kriteret nëse ai i plotëson për një pozicion në Apel”, deklaroi gjatë mbledhjes Brunilda Kadi. Po ashtu, edhe anëtari tjetër i KLGJ-së, Erjon Muharremaj, deklaroi se në kushtet kur janë emëruar 3 gjyqtarë, Dvorani e ka përmbushur detyrimin e tij për të qëndruar në detyrë.

Sipas tij, KLGJ duhet t’i ofrojë mundësinë për një pozicion në nivelin e gjykatave të Apelit. Anëtari tjetër u KLGJ-së, Ilir Toska, u shpreh se duke vlerësuar se qëndrimi në detyrë i Dvoranit ka qenë i përligjur deri më tani, vijimi i qëndrimit të tij nuk mund të justifikohet. Ky vendim i Këshillit të Lartë Gjyqësor vjen vetëm një ditë pasi EURALIUS dhe OPDAT kishin deklaruar përmes një letre të përbashkët se ata nuk mund të shpreheshin për çështje individuale.

Sipas tyre, ky vendim i takonte KLGJ-së dhe më tej shprehnin gatishmërinë për të dhënë asistencën e tyre teknike në çdo rast që do të kërkohet, nga të gjitha institucionet e reja të drejtësisë që kanë dalë nga reforma, apo që janë në proces ringritje si pasojë e procesit të vetingut.

Pas këtij vendimi, Ardian Dvoranit i është krijuar një mundësi që të mund të vijojë karrierën e tij në një nga gjykatat e Apelit. Kjo e drejtë i takon çdo anëtari të Gjykatës së Lartë, që largohet si pasojë e përfundimit të mandatit.

Dvorani: Gafë e paimagjinueshme, Reforma në Drejtësi ka rrugë të gjatë

Pas vendimit që mori Këshilli i Lartë Gjyqësor, nuk vonoi edhe reagimi nga Ardian Dvorani. Ky i fundit, pasi mësoi shkarkimin nga Gjykata e Lartë dhe si rrjedhojë edhe nga drejtimi i Këshilli i Emërimeve në Drejtësi, e cilësoi vendimin si një gafë të paimagjinueshme. Sipas tij, mbetet për t’u parë se çfarë do të thuhet në arsyetimin e këtij vendimi që mori KLGJ dje.

Më tej, Ardian Dvorani nënvizon se Reforma në Drejtësi ka një rrugë shumë të gjatë përpara për të kapur qëllimin e mirë, për të cilin u nis dhe në fund vë theksin se vendimi për të është marrë me 6 vota pro dhe 4 kundër. “Juridikisht është një gafë e paimagjinueshme. Por duhet të shikoj çfarë do të katranosin në arsyetim.

Reforma e Drejtësisë ka ende rrugë të gjatë për të provuar qëllimin e mirë të saj. Votimi ka qenë 6 me 4”, pohoi Dvorani, që tashmë pritet të shihet nëse do të zgjedhë ta vijojë karrierën e tij në një nga Gjykatat e Apelit, pas mundësisë që i ka krijuar KLGJ./Panorama/