Ledina Riza zgjidhet anëtare e KLP, për kreun e SPAK s’ka të interesuar

Anëtarja e re e Këshillit të lartë të Prokurorisë, KLP, është zgjedhur Ledina Riza. Në Asamblenë e Përgjithshme ku votuan 200 prokurorë, Ledina Riza arriti të merrte 113 vota përballë Etien Kapos i cili mori 83 vota ndërsa 4 të vota u cilësuan të pavlefshme.

Ndërkohë nga hapja e garës për kreun e ri të SPAK ende nuk është paraqitur asnjë kandidaturë pranë KLP-së. 

“Institucion i ri, është krijuar çdo gjë nga e para. Besoj që është bërë puna më e  mirë e mundshme,” tha sot kreu i SPAK, Arben Kraja ndërsa e pranoi se ndaj prokurorëve të SPAK kishte raste presionesh.

“Prokurorë e gjyqtarë të SPAK kanë çështje të vështira për të trajtuar qoftë për personazhe të krimit të organizuar. Ka pasur presion, por kanë mbrojtje siç ja parashikon ligji.”

Kreu aktual i SPAK, Arben Kraja, përfundon mandatin në datën 19 dhjetor, kur pritet që drejtuesi i ri të marr detyrën dhe Kraja të vazhdoj punën si prokuror i SPAK.

Ndryshe, prokuror i SPAK ka mandati 9 vjeçar ndërsa drejtuesi zgjidhet çdo 3 vite. Drejtuesi i SPAK nuk ka të drejtë rizgjedhjeje, gëzon vetëm 1 mandat.