Rishi Sunak, kryeministër i Britanisë

Rishi Sunak zyrtarisht u emërua në postin e kryeministrit të Britanisë.

Sot, Mbreti Charles III e ftoi Sunakun që të formojë Qeverinë e re britanike.

“Aktualisht, vendi ynë po përballet me një krizë të thellë ekonomike. Pasojat e Covid vazhdojnë ende dhe lufta në Ukrainë ka destabilizuar tregjet në mbarë botën,” tha Sunak pasi mori ftesën nga Mbreti Charles III dhe mbajti fjalimin e parë nga Downing Street duke shtuar:

“Kjo qeveri do të ketë integritet, profesionalizëm dhe llogaridhënie në çdo nivel. E kuptoj që kemi sfida të mëdha para, por e vetmja gjë që mund të them është se nuk kam frikë. Së bashku mund të arrijmë gjëra të pabesueshme. Ne do të krijojmë një të ardhme të denjë për sakrificat që kanë bërë kaq shumë dhe do ta mbushim nesër dhe çdo ditë që vjen, me shpresë. Faleminderit.”

Ndryshe, Rishi Sunak zëvendëson Liz Truss e cila dha dorëheqje javën e kaluar pas 44 ditësh si kryeministre, pasi që programi ekonomik që ajo prezantoi, shkaktoi trazira në tregjet financiare, duke bërë që të humbiste mbështetjen e Partisë Konservatore.

Sunak, ish-ministër i Financave, është kryeministri i parë i Britanisë me prejardhje indiane.