Ekspozitë, DPA: Geraldina Zogu, trëndafili i bardhë i Shqipërisë! 

Drejtoria e Përgjithshme e Arkivave, DPA, në bashkëpunim me Familjen Mbretërore Shqiptare dhe me Kalanë e Tiranës, të enjten, më datë 27 tetor 2022, hap ekspozitën “Geraldina Zogu, Trëndafili i Bardhë i Shqipërisë”. 

Duke iu drejtuar mjediseve të Kalasë së Tiranës, nga ora 13:00, publiku kryeqytetas, vizitorë të huaj, studiues, biografistë, dashamirës të historisë apo kureshtarë mbi tematikën, do të kenë mundësinë të vizitojnë ekspozitën e përgatitur me dokumente historike të Arkivit Qendror Shtetëror.

Ndër të tjera, këto dokumente shpalosin informacione lidhur me veprimtarinë e Mbretëreshës Geraldinë në Shqipëri, të dhëna të saj biografike dhe përgatitjet e kryera për celebrimin e martesës me Mbretin Ahmet Zogu I.

Ndër dokumentet e përzgjedhura janë:

– Vendim i Politeknikut Tiranë, datë 1 qershor 1938, mbi kënaqësinë e mbretëreshës Geraldinë për pranimin e titullit si “patronja” e Institutit;

– Korrespondencë e një orekstre rumune që do të merrte pjesë në martesën mes Ahmet Zogut dhe mbretëreshës Geraldinë;

– Mbretëresha Geraldinë kërkon që me rastin e Vitit të Ri t’u ofrojë praninë e saj fëmijëve jetim të Tiranës, gjatë pirjes së një çaji pranë Pallatit Mbretëror.

– Programi i fejesës së Mbretit Zog I me konteshën Geraldina Aponnyi;

– Biografi të mbledhura mbi familjen e konteshës Aponnyi;

– Dëshmi e Mbretit Ahmet Zog dërguar kryeministrit më 30 janar 1938 mbi dëshirën për të pranuar si bashkëshorte konteshën Geraldi Aponnyi, referuar nenit 89 të Statutit Themeltar Mbretëror;

– Përgjigje e kryetarit të Parlamentit drejtuar kryeministrisë më datë 31 janar 1938, e cila çmon se martesa e sovranit tonë Ahmet Zog është komform Statutit Themeltar të Mbretërisë;

– Telegrame përshëndetje mes kryetarit të Parlamentit, Pandeli Evangjeli, drejtuar Mbretëreshës Geraldinë më 6 gusht 1938, mbi ditëlindjen e saj të parë në Shqipëri dhe pëlqesa e mbretëreshës mbi këtë gjest;

– Lista e shpenzimeve e martesës së mbretit Zog;

– Telegrame urimi mbi lajmin e gëzueshëm të martesës midis mbretit Ahmet Zog dhe princeshës Geraldinë;

– Telegrame urimi drejtuar Mbretit Zog me rastin e lindjes së princit trashëgimtar.

Ndryshe, ky aktivitet zhvillohet në kuadër të përvjetorit të vdekjes së Mbretëreshës së Shqiptarëve.

Ekspozita do të qendrojë e hapur deri të premten, datë 28 tetor.