Lëshohet urdhër-arresti për Agim Kajmakun, ja akuzat…
Prokuroria e Rrethit Gjyqësor Tiranë ka lëshuar urdhër-arrestin për Kryetarin e shkarkuar të Bashkisë Vorë, Agim Kajmaku. Policia ka shkuar në banesën e Kajmakut por nuk e ka gjetur, ndërkohë që po kryhen kontrolle edhe në vende të tjera.
Agim Kajmaku, i shkarkuar nga posti i kryetarit të Bashkisë Vorë nga ana e KQZ-së, për shkeljen e ligjit të dekriminalizimit, për të cilin është lëshuar urdhër-arresti, akuzohet për falsifikim të formularëve dhe ushtrim i funksioneve pas dhënies fund të detyrës.
“Prokuroria e Rrethit Gjyqësor Tiranë, ka shpallur ne kerkim me mase sigurimi me arrest ne burg, ne lidhje me hetimin qe zhvillohet ne ngarkim te shtetasit Agim Kajmaku, i dyshuar per kryerjen e veprave penale, Shperdorim detyre, sipas nenit 248 te Kodit Penal, falsifikimi i formulareve, neni 190 i Kodit Penal, dhe Ushtrimi i funksioneve pas dhenies fund te detyres, neni 249 i Kodit Penal”.
Akuza e fundit ka të bëjë me shkarkimin e punonjësve, në kohën që KQZ kishte shpallur shkarkimin e tij nga detyra.
Ndryshe, pas vendimit të KQZ, Agim Kajmaku ka shkarkuar nga detyra dy Nënkryetarët e Bashkisë Vorë, megjithëse edhe vetë Kajmaku ishte zyrtarisht i shkarkuar si Kryebashkiak.
Pavarësisht se Agim Kajmaku iu drejtua me një letër kryeprokurores së përkohshme Arta Marku, ku thoshte se ishte shpallur i pafajshëm nga Gjykata e Apelit të Janinës për falsifikim të kartëmonedha nën emrin e Jorgo Totos, fshehja e kësaj çështjeje në formularin e vetëdeklarimit, përbënë shkelje.
“Nga verifikimet e kryera konfirmohet se subjekti Agim Kajamaku ka patur dijeni të plotë në lidhje me faktin që ka qenë në hetim penal në Greqi dhe se ndaj tij kishte një process gjyqësor penal në zhvillim. Kjo, sepse ai është arrestuar në flagrancë dhe ka dalë para gjykatës greke ku i është bërë e ditur e gjithë procedura që do ndiqet ndaj tij. Nga ana tjetër rezulton se subjekti ka kryer veprime konkrete për fshehjen këtij fakti para autoriteteve shqiptare, duke ndryshuar në datë 30.3.2004 emër/mbiemër nga “Jorgo Toto” në “Agim Kajmaku”, si dhe duke mos e deklaruar këtë fakt në formularin e Vetëdeklarimit”, thuhet në shkresën e prokurorit Arben Kraja.
Kreu i III-të, pika 3, gërma “ç”, e vendimit nr.17/2016 të Kuvendit të Republikës së Shqipërisë, thuhet se “pasqyrimi i të dhënave të pavërteta, të paplota, dhe të pasakta në të, passjell përjashtimin e menjëhershëm dhe në çdo kohë nga kandidimi/zgjedhja/emërimi apo nga funksioni publik”.
