Lezhë, Grupimi i Qendrës së Djathtë: Më 30 Qershor, nuk do të lejojmë zgjedhje farsë

Grupimi i Qendrës së Djathtë, “Forumin për Zgjedhje të Lira” sot e zhvilluan me strukturat në Lezhë ku u diskutua për krizën politike dhe institucionale, zgjidhjet e mundshme si dhe zgjedhjet e 30 Qershorit.

“Mbas 30 vitesh tranzicion, ka ardhur koha që njëherë e përgjithmonë zgjedhjet të zhvillohen të lira, të ndershme dhe të barabarta, me një ‘qeveri Tranzitore’ pa Edi Ramën kryeministër,” theksuar liderët e pesë partive opozitare, Fatmir Mediu i PR, Agron Duka i PAA, Nard Ndoka i PDK, Dashamir Shehi i LZHK dhe  Vangjel Dule i PBDNJ, në Lezhë aty ku zgjedhjet e lira dhe të ndershme u goditën rëndë si në zgjedhjet vendore të vitit 2015 ashtu edhe ato të përgjithshme në vitin 2017.

Me këtë rast, Aleatët e Partisë Demokratike u shprehën qartë se qytetarët nuk do të lejojnë që zgjedhjet e 30 qershorit të kthehen në një farsë të demokracisë ndërsa i bënë apel të gjithë elementëve të përgjegjshëm të shoqërisë dhe politikës shqiptare, për të shmangur përplasjen dhe konfliktin.

Në fund, Grupimi i Qendrës së djathtë përveç angazhimit për moslejimin e zgjedhjeve farsë, i bënë thirrje qytetarëve të Lezhës për pjesëmarrje sa më të madhe në Protestën e Madhe të opozitës më 25 maj.