Liga e Kombeve/ Fillim i mbarë, Shqipëria mposht Izraelin 1:0

Shqipëria zhvilloi në “Elbasan Arena” ndeshjen e parë të Ligës së Kombeve ndaj Izraelit, e vlefshme për Grupin 1 të Ligës C. Kuqezinjtë e nisin mbarë kompeticionin e ri të UEFA-s, duke fituar 1-0 me golin e shënuar në pjesën e dytë nga Taulant Xhaka.

Pjesa e parë mbyllet pa gola, me kuqezinjtë që në fund kishin mundësinë të shënonin, por edhe miqtë kishin rastet e tyre për të realizuar.

Pjesa e dytë e ndeshjes ishte më e mirë për përfaqësuesen tonë. Në minutën e 50 Memushi finalizoi aksionin me një gjuajtje tokasi që rrezikoi portën e Izraelit. Një tjetër aksion nis nga mesfusha ku në minutën e 53 godet Basha.

Por finalizimi erdhi nga Taulant Xhaka në minutën e 55-të me një goditje fantastike nga jashtë zone, duke kaluar në avantazh Shqipërinë.

Skuadra shqiptare rrezikon përsëri në minutën e 58, ndërsa vazhdon presionin ndaj kundërshtarit. Në minutën e 63-të Hysaj, pas një kundërsulmi të shpejtë nisur nga mesfusha jonë rrezikoi portën e kundërshtarit. Edhe në minutën e 75-të Hyka ishte pranë golit të dytë, por portieri izraelit ishte në lartësinë e duhur.

Deri në fund të besuarit e Panuccit ruajnë avantazhin dhe marrin tri pikët e para në Grup.

Më 10 shtator Shqipëria do të luajë ndeshjen e dytë me Skocinë.