Liga e Konferencave, Policia Rrugore: Unaza e Vogël do jetë pedonale, ja ku lejohet lëvizja me mjete

Duke pasur parasysh numrin shumë të madh të tifozëve që po vijnë nga Rinasi dhe Durrësi për finalen e Ligës së Konferencave të Evropës që luhet mbrëmjen e sotme, në orën 21:00, në stadiumin Air Albania, Drejtori i Policisë Rrugore Altin Qato, ka sqaruar masat e marra për finalen e Conference League që do të zhvillohet sot në Tiranë ku kufizimi i qarkullimit me qëllim të krijimit të lehtësirave sa më të mëdha tifozëve të cilët e njohin pak qytetin tonë, është ndarë në disa nivele:

“Kufizimi i parë ka të bëjë me rrugët interurbane kryesore që furnizojnë Tiranë dhe kanë të bëjnë më tepër nga krahu që vijnë tifozët, Rinas-Tiranë, Durrës-Tiranë dhe aksi Fushë-Krujë-Tiranë sepse ka një numër tifozësh sipas njoftimeve të cilët do të zbresin në aeroportin e Prishtinës dhe Potgoricës që do të drejtohen me autobusë dhe mjete private të marra me qira në këto shtete në drejtim të Tiranës. Shtojmë dhe krahun e Elbasanit. Nuk do lejohet asnjë mjet i tonazhit të rëndë.

Rrugët Tiranë-Durrës, Durrës-Tiranë, Rinas-Tiranë, pjesën e TEG-ut në drejtim të Tiranës, Fushë-Krujë, krahu i Vorës do jenë rrugë të dedikuara vetëm për mjete që transportojnë tifozë që do marrin pjesë brenda stadiumit për të parë ndeshjen, ose që janë të organizuar për të ardhur për të parë ndeshjen në fan-zonat e përcaktuara. Do jetë një kufizim i plotë. Kemi marrë masat, kemi njoftuar shërbimet përkatëse. Janë rrugë totalisht të dedikuara për mjetet që transportojnë tifozë,” tha Qato deri sa pjesa e dytë e kufizimeve ka të bëjë me Unazën e Mesme:

“Ajo do i dedikohet mjeteve të tifozëve, të cilët kanë disa stacione të përcaktuara. Janë përcaktuar dhe parkimet. Janë përcaktuar Rruga e Kosovarëve dhe parkimet rreth kësaj rruge janë të dedikuar për tifozë italianë. Pjesa që ka të bëjë me dy krahët e Bulevardit Bajram Curri dhe Zhan D’ark janë të dedikuar për autobusë që transportojnë tifozët e Feyenoord,” tha Qato duke përfunduar:

“Kufizimi i tretë do jetë Unaza e Vogël. Nuk do ketë asnjë lidhje hyrëse nga Unaza e Mesme në Unazën e Vogël. Të gjitha rrugët lidhëse do jenë të bllokuara dhe nuk do lejohet asnjë mjet për të hyrë. Këtu lejohet vetëm 3 kategori mjetesh që do lejohen, kategoria e mjeteve që shoqërohet nga policia, ekipet, personalitet VIP të përcaktuara nga UEFA që do të shoqërohen me eskortë të policisë, janë media e cila hyn nga rruga Dervish Hima. Pjesa tjetër që kanë bileta do hyjnë nga sheshi Shopen. Brenda Unazës së Vogël nuk do ketë qarkullim, do jetë një zonë pedonale, përveç një harku kohor të përcaktuar 2 orë para ndeshjesh që do qarkullojnë këto mjete të dedikuara.”

Ndryshe, dhuna që pushtoi kryeqytetin shqiptar mbrëmjen e kaluar tregoi një mungesë profesionalizmi të policisë shqiptare ku për pasojë lëndime fizike kanë marrë dhjetëra persona, efektivë policie por dhe tifozë ndërkohë janë parë dhe skena të turpshme ku policë me armë në dorë kërcënojnë tifozët.

Kështu, në Spitalin e Traumës, gjatë natës janë paraqitur 30 persona të dëmtuar, nga të cilët 20 efektivë policie. Pas akuzave mbi tifozët e egër holandezë, Ambasada e Holandës në Tiranë ka sqaruar se 12 qytetarë nga Holanda janë ndaluar nga policia dhe ndodhen në komisariat ndërsa 5 tifozë të tjerë janë lënduar letë dhe kanë marrë ndihmë mjekësorë e më pas kanë lënë spitalin.

Ndërkohë mësohet se mëngjesin e sotëm, policia ka kthyer mbrapsht nga Porti i Durrësit në Itali, 80 tifozë të cilët janë dyshuar si të rrezikshëm.

Pas trazirave të shkaktuara gjatë natës, Policia e Shtetit duke reaguar përmes Zv. Drejtorit të Përgjithshëm të Policisë, Albert Dërvishi, thekson se tifozët e të dyja skuadrave kanë tentuar të konfliktohen ku pas ndërhyrjes së policisë janë dëmtuar 19 policë, njëri prej të cilëve është goditur me thikë ndërsa në komisariat janë shoqëruar 60 tifozë dhe gjatë kontrolleve i janë gjetur thika, leva, doreza hekuri dhe lëndë të tjera piroteknike.

“Si pasojë e dhunës së ushtruar, janë plagosur 19 punonjës policie, njëri prej të cilëve është plagosur me thikë. Janë dëmtuar 4 automjete policie. Për sa më sipër në qendrat spitalore janë dërguar për ndihmë mjekësore 10 shtetas, 5 shqiptarë, 3 italianë dhe 2 holandezë. Shërbimet e Policisë së Shtetit, bazuar në procedurat standarde të punës, i kanë bërë thirrje tifozëve për të ndërprerë përdorimin e dhunës. Në raport me sjelljen e kundërveprimin e tifozëve, është ndërhyrë në mënyrë të përshkallëzuar duke bërë të mundur shpërndarjen e tyre. Janë shoqëruar 60 tifozë problematikë nga të dyja skuadrat, 48 italianë dhe 12 holandezë. I janë sekuestruar leva, gurë, thika, lëndë piroteknike”, tha Dervishi duke rikujtuar se në bazë të Kodit Penal kundërshtimi I punonjësit që kryen një funksion publik është vepër penale dhe kur kryhet më shumë se një herë ose në grup dënohet me burgim deri në 5 vjet.