“Liri Suedi”, qindra suedezë protestojnë kundër masave për luftim të pandemisë

Qindra persona kanë protestuar sot në Stokholm kundër masave të prezantuara për luftimin e pandemisë së koronavirusit, duke shkelur kështu një rregull sa u përket tubimeve publike.

Protesta nuk ishte e autorizuar.

Pak pasi protestuesit janë mbledhur në një nga sheshet kryesore të kryeqytetit, atyre u është kërkuar të shpërndahen. Policia tha se vetëm nga tetë persona lejohen që të mblidhen gjatë pandemisë.

Protesta e quajtur Liri Suedi, është thirrur nga disa grupe në rrjetet sociale, ku mbështetësit kanë shprehur kritika rreth kufizimeve dhe informacioneve të ofruara nga autoritetet.

“Shumë njerëz në Suedi janë ngopur me këto kufizime, që janë të pabazuara, andaj duan të përballen me to,” tha organizatori Filip Sjostrom për të përditshmen suedeze, Expressen.

Disa protestues janë parë edhe me pllakate kritike për vaksinimin.

Deri të premten, rreth 7 për qind e popullsisë së rritur në Suedi ka marrë dozën e parë të vaksinës kundër koronavirusit, ka njoftuar Agjencia e Shëndetit Publik të Suedisë.

Ndryshe, Suedia me 10.3 milionë banorë, raporton RFE, ka regjistruar 13.003 vdekje të lidhura me koronavirus dhe 684.000 raste të infektimit, prej kur ka shpërthyer pandemia.