“Luftë” për 300 kg kokainë, ja kush e urdhëroi vrasjen e Jan Prengës
Pas marrjes peng dhe dhunës barbare të Jan Prengës, më 17 janar, në Kamëz, ka dyshime të forta se trupi i pajetë i Prengës është groposur në territorin e Shijakut.
Marrja peng e Jan Prengës është urdhëruar nga një grup i strukturuar kriminal, me bazë në Angli, dhe i përbërë kryesisht nga shqiptarë.
Burime zyrtare pranë Policisë së Shtetit konfirmojnë për BW faktin se vëllai i Jan Prengës, që jeton në Angli, është kontaktuar nga një grup i fuqishëm që me kamionin e tij të nxjerrë nga Mbretëria e Bashkuar mbi 300 kg kokainë, që mbërrinte nga Amerika Latine.
Nga përgjimet rezulton se ai e ka marrë lëndën narkotike, por nuk e ka dorëzuar në destinacion. Për këtë, mendohet se grupi kriminal ka urdhëruar marrjen peng të vëllait të tij, Jan Prenga, i cili për shkak të torturave të shumta, ka gjetur vdekjen.
“Nga veprimet e thelluara hetimore ka rezultuar se personat, pas rrëmbimit të shtetasit J. P., kanë shkuar direkt në resortin në pronësi të shtetasit A. H. Po nga veprimet hetimore rezulton se personi i rrëmbyer, si pasojë e goditjeve të marra në Kamzë dhe humbjes së gjakut, ka ndërruar jetë gjatë rrugës për ta transportuar për në resort, aty ku do mbahej peng,” njoftoi policia duke saktësuar se ky rrëmbim ka ardhur si pasojë e një konflikti që një nga vëllezërit e viktimës ka pasur me organizatoret dhe rrëmbyesit, si pasojë e disa konflikteve kriminale në Britaninë e Madhe.
Prenga ka ndërruar jetë pa mbërritur te resorti lukzos në pronësi të Altin Hajrit, i cilësuar nga autoritetet italiane si “kapo” i drogës. Ndërkohë, për ngjarjen kriminale janë arrestuar Bajram Hajri, djali i tij, Leonard Hajri, Olsi Turja dhe Elton Hajri.
Katër personat e arrestuar, rezulton nga hetimet, janë thjeshtë ekzekutorët që kanë dhunuar e zhdukur trupin e Jan Prengës, por urdhri ka ardhur nga një grup i strukturuar kriminal me bazë në Angli.
