Makina bie në kanal, babë e bijë humbën jetën

Një aksident i rëndë ka ndodhur në fshatin Kolonjë të Lushnjës, ku babë e bijë, kanë humbur jetën pasi mjeti me të cilin udhëtonin ra në kanal.

Policia e Lushnjes nuk ka dhënë ende një njoftim zyrtar për aksidentin, që ndodhi pranë Urës së Bubullimës por mësohet se një makinë ka humbur kontrollin dhe ka rënë përmbys në një kanal. Pavarësisht se kanali ka qenë i cekët, dyshohet se shpejtësia e lartë me të cilën udhëtonte mjeti është bërë shkak për këtë aksident fatal.

Ende nuk janë identifikuar personat që kanë humbur jetën, ndërsa policia dhe grupi hetimor po punojnë për zbardhjen e rrethanave të aksidentit.