Mali i Zi hap kufirin për SHBA, Shqipërinë, Kosovën…

Mali i Zi ka hapur përfundimisht kufirin për qytetarët rezident në SHBA, si dhe për vendet e rajonit duke përfshirë Shqipërinë dhe Kosovën, dhe ashtu siç ishte paralajmëruar me testin për koronavirus, PCR ose ELISA ndërsa lokalet janë lejuar të punojnë deri në orën 01:00 pas mesnatës. Lajmin e ka bërë të ditur Qeveria e Malit të Zi pas vendimit të Organit Kombëtar të Koordinimit për sëmundet infektive, NKT.

“Rezidentët në Shtetet e Bashkuara, Serbi, Kosovë, Shqipëri, Bosnje Hercegovinë dhe Maqedoni e Veriut, si dhe shtetasit e vendit tonë që kanë qëndruar në këto shtete mund të futen në Mal të Zi me rezultatin negativ të testin për koronavirus PCR ose rezultatin pozitiv të antitrupave për koronavirus IgG i dalë nga testi serologjik ELISA, i cili është lëshuar jo më shumë se 72 orë më parë, dhe me kushtin që 15 ditë para hyrjes në Mal të Zi nuk kanë qëndruar në njërin nga shtetet që nuk u lejohet hyrja në vendin tonë,” thekson NKT pas propozimit të Institutit të Shëndetit Publik të Malit Zi, IJZ, në përputhje me situatën epidmeiologjike në këto shtete ndonëse mëngjesin e djeshëm Drejtori i IJZ, Dr.Boban Mugosha, Kosovën nuk e renditi ndër “shtetet e sigurta epidemiologjike”.