Mali i Zi, vazhdojnë arrestimet në nivele të larta të drejtësisë
Me urdhër të kreut të Prokurorisë Speciale të Malit Zi është arrestuar Kryetari i Gjykatës Ekonomike, Bllazho Jovaniç dhe dhjetëra persona nga disa qytete, nën dyshimin e krijimit të grupit të strukturuar kriminal dhe keqpërdorimit të postit zyrtar
Ky arrestim i Kryetarit të Gjykatës Ekonomike, Bllazho Jovaniç vjen pas arrestimit të Ish-Kryetares së Gjykatës së Lartë të Malit të Zi, Vesna Medenica, me akuzën se për katër vjet kishte mbajtur në sirtar çështjen e Kombinatit të Duhanit Podgorica “DKP” në falimentim dhe nuk ka lejuar që aktet e çështjes të shkojnë në Gjykatën e Lartë të Malit të Zi, në mënyrë që kjo gjykatë, si shkalla më e lartë të vendos për rekursin të cilin e kërkoi Shoqata për mbrojtjen e interesave të aksionerëve pakicë të “DKP”.
Në emër të 3.600, aksionerëve pakicë, më 27 Nëntor të vitit 2015 Shoqata për mbrojtjen e interesave të aksionerëve pakicë të “DKP” kërkoi rekursin në Gjykatën e Lartë ndaj vendimit të Gjykatës Ekonomike dhe asaj të Apelit, raporton televizioni publik i Malit Zi, RTCG.
Aksionin e Prokurorisë Speciale të Malit Zi e ka përshëndetur Kryeministri Dritan Abazoviç duke theksuar se kjo është përgjigja më e mirë ndaj kritikave për përpjekje të pamjaftueshme në luftë kundër krimit të organizuar dhe korrupsionit.
“Drejtësia ka nisur më parë, tani do të marrë edhe më shumë vrull. Grupet mafioze i kanë sjellë dëme të mëdha shtetit në periudhën e mëparshme, dhe aksioni në fjalë është fillim i mbarë: Tani ka ardhur koha që secili të jap përgjegjësi për atë që ka bërë,” tha Abazoviç ndërsa Ministri i Brendshëm i Malit të Zi, Filip Axhiç duke përshëndet aksionin e Drejtorisë së Policisë në arrestimin e Kryetarit të Gjykatës Ekonomike me bashkëpunëtorë, tha se ky është vetëm fillimi:
“Ne mirëpresim aksionin e policisë, aksion që është ndërmarrë me urdhër të kreut të porsazgjedhur të Prokurorisë Speciale. Ky është vetëm fillimi në forcimin e besimit në institucionet e sigurisë. Veprimet si këto të fundit, janë treguesi më i mirë i përkushtimit të luftës së pakompromis kundër krimit të organizuar dhe korrupsionit, i cili është i një nga prioritetet kryesore të qeverisë.”
Ndryshe, në raportet e bashkësië ndërkombëtare vazhdimisht theksohej se në Mal të Zi ekziston “mafia e falimentimit”, pjesë e së cilës janë gjyqtarë të korruptuar dhe administratorë të falimentimit, të cilët me veprime e tyre antiligjore i kanë sjellë dëme të mëdha shtetit.
