Pas vizitës në paraburgim në Hagë, Edi Rama: Thaçin e gjeta në top formë!

Pas vizitës që i bëri Ish-Presidentit të Kosovës, Hashim Thaçi, në paraburgim në Hagë, Kryeministri Edi Rama tha se ishte një çmallje e nevojshme ndërsa Thaçi e gjeti të bindur dhe më shumë se para se të vinte këtu, që ishte një rrugë e pashmangshme për të provuar pastërtinë e plotë të luftës çlirimtare!

“Ishte një vizitë, ishte një çmallje e nevojshme, Thaçi e gjeta në top formë, i bindur mbase dhe më shumë se para se të vinte këtu që ishte një rrugë e pashmangshme për të provuar katërcipërisht para drejtësisë pastërtinë e plotë të luftës çlirimtare dhe të idealit të ushtrisë,” tha Edi Rama duke përfunduar:

“Nuk ka shumë për të thënë, natyrisht që të gjithë ne jemi të bindur se lufta çlirimtare e Kosovës nuk mund të rishkruhet dhe as të futet në korniza të tjera sepse është tanimë e futur në kornizën e artë të heroizmit e sakrificave dhe gjakut të dhënë, dhe përpjekjeve që kanë vijuar më tej për Kosovën e lirë.”