Mandati i dytë, Emmanuel Macron President i Francës
Presidenti francez, Emmanuel Macron, ka shënuar fitore bindëse ndaj rivales së tij të së djathtës ekstreme, Marine Le Pen, në raundin e dytë të zgjedhjeve presidenciale që u zhvilluan sot në Francë.
Sipas projeksioneve të besueshme, të bazuara në rezultate reale, Macron, 44-vjeçar, ka fituar më shumë se 58 për qind të votave, në krahasim me më pak se 42 për qind sa ka fituar Le Pen, 53-vjeçare.
Momentet e gëzimit janë parë menjëherë në ekranet e mëdha afër Kullës Eiffel, ku janë mbledhur mbështetësit e Macronit, të cilët janë parë me flamuj francezë dhe ata të Bashkimit Evropian.
‘Jam president i të gjithëve’
Macron ka nisur fjalimin e fitores duke falënderuar mbështetësit e tij dhe popullin francez.
Ai tha se është i vetëdijshëm se disa e kanë votuar për të bllokuar të djathtën ekstreme.
Macron tha se është duke menduar për ata që nuk e kanë votuar dhe ata që kanë votuar për Le Penin e tani janë të zhgënjyer.
“Prej tani e tutje unë nuk jam kandidat i një kampi, jam president i të gjithëve”.
“U them atyre që kanë votuar për të djathtën ekstreme që do të jetë përgjegjësi e imja dhe ekipit tim që të adresojmë shqetësimet e tyre”.
Mbështetësit e tij kanë bërtitur “edhe një, edhe dy, edhe pjesë vjet tjerë”.
Avec vous. Pour vous. Pour nous tous.https://t.co/lA5u4Sv82Q
— Emmanuel Macron (@EmmanuelMacron) April 24, 2022
“Do të punoj për një shoqëri më të drejtë dhe për barazi në mes të burrave dhe grave,” tha Macron.
“Ne duhet të tregojmë respekt sepse shteti ynë është aq i ndarë… askush nuk do të lihet anash”.
Presidenti francez po ashtu tha se “kjo epokë e re nuk do të vazhdojë me metodat e pesë vjetëve të fundit”.
“Lufta në Ukrainë na tregon se jemi duke jetuar në kohëra tragjike”, duke shtuar se Franca duhet të ndërtojë forcat e veta.
Macron e ka përmbyllur fjalimin e tij duke thënë se është krenar që do t’i shërbejë sërish popullit francez.
Në anën tjetër, mbështetësit e Le Penit kanë bërtitur me zemërim teksa kanë marrë vesh lajmin.
Le Pen, mbështetësve: Edhe ky rezultat përbën fitore
Liderja e të djathtës ekstreme, Marine Le Pen u është drejtuar menjëherë mbështetësve që me zë të lartë thirrën emrin e saj.
Ajo tha rezultatet – që parashohin humbjen për të – përbëjnë fitore për partinë e saj, dhe ajo respekton rezultatin e zgjedhjeve.
Le Pen ka shtuar se do të vazhdojë të luftojë në politikën franceze, ndonëse në të kaluarën ka thënë se mund ta lë politikën nëse humb garën.
Ajo ka falënderuar njerëzit që e kanë votuar dhe është larguar nga foltorja.
Liderët evropianë urojnë Macronin
Presidenti i Këshillit Evropian, Charles Michel, ka mirëpritur rezultatin dhe ka uruar Macronin për parashikimet për fitore.
Përmes një postimi në Twitter, Michel ka thënë se Bashkimit Evropian i duhet një Francë e përkushtuar ndaj projektit të bllokut evropian në një kohë turbulente në kontinent./RFE/
