Maqedon, jam shqiptar se jo mahi!
nga Agim Popoci
Ndërsa dita e zgjedhjeve presidenciale në Maqedoni të Veriut ka filluar numërimin mbrapsht, kandidimi i shqiptarëve po shndërrohet në një dramë që i tejkalon edhe përmasat e komikes!
Maqedonët ose më saktë dy partitë kryesore maqedone, LSDM dhe VMRO-DPMNE, kandidojnë më 24 Prill me kandidatët e zgjedhjeve të kaluara, Gordana Siljanovska dhe Stevo Panderovski, jo duke shpresuar në fitore sepse e kanë të pamundur në raundin e parë, por, në votën shqiptare të raundit të dytë më 8 Maj!
Nga ana tjetër, shqiptarët që pretendojnë se janë integruar në këtë shtet që sot për fat të mirë është anëtar i NATO-s dhe para portës së Bashkimit Evropian, po shkelin në këtë garë presidenciale me dramacitet shumë më të madhe se sa në zgjedhjet e kaluara, sërish duke iu treguar shqiptarëve se sa shqiptarë që janë dhe jo maqedonëve!
Këtë dramë komike do ta kishte zili edhe i madhi Faruk Begolli, kur i lindi ideja për ta sjellë në skenë shqiptare dramën “Profesor, jam talent se jo mahi”, pasi në garën presidenciale në Maqedoni të Veriut na shfaqen që të gjithë, edhe profesori, edhe talenti, dhe në masë shumë më të rëndë se dërrasat e skenës së një teatri, edhe mahia!
Përkundër postit honorofik që ka Presidenti, shqiptarët e dramatizojnë këtë garë presidenciale duke i sajuar akte pa fund me shpresën tek përçarja e maqedonëve, në mënyrë që ta zgjedhin presidentin shqiptar!
Dhe, deri sa Arben Taravari shfaqet si kandidat i opozitës shqiptare VLEN dhe Bujar Osmani i BDI-së, për President të Maqedonisë së Veriut, për t’u ulur në fronin e Ali Ahmetit si lider opozitar pretendojnë liderët e katër partive: Lëvizjes Demokratike, Alternativës, Lëvizjes Besa dhe Aleancës për Shqiptarët!
Por ilariteti nuk mbaron këtu, në këtë komedi shqiptare na shfaqet dhe zëvendësuesi i Sali Berishës, tashmë për të përçarë Bashkimin Demokratike për Integrim, Kryeministri i Kosovës, Albin Kurti!
Po aq sa ishte e pakuptimtë ndërhyrja në punët e brendshme të PPD nga ana e Presidentit Sali Berisha 30 vite më parë, ose Kryeministrit Edi Rama 7 dhe 1 vit më parë, po aq është e pakuptimtë ndërhyrja e Kryeministrit Albin Kurti sot në jetën politike në Maqedoni të Veriut.
Krijimi i VLEN me ndërhyrjen e Kurtit s’vlen fare! Nëse ky koalicion opozitar është krijuar për të fituar zgjedhjet presidenciale atëherë ai po tallet me shqiptarët dhe po bënë lojën e maqedonëve; Dhe, nëse heq dorë nga ky idiotizëm, atëherë duhet t’u thotë shqiptarëve rrezikun që ju vjen nga maqedonët si Pendarovski dhe Kovaçevski, ose edhe më keq nga Zoran Zajev që vazhdon të jetë dhe nënpunës i Presidentit të Serbisë, Aleksandar Vuçiç, dhe jo të lëshojnë akuza në drejtim të Kryetarit të BDI, Ali Ahmetit, për t’ju thonë shqiptarëve se sa shqiptarë që janë!
Ndryshe, maqedonët do të vazhdojnë të tallen duke mos ndryshuar as kandidatët edhe në zgjedhjet e ardhshme, e sa për ëndrrën shqiptare të fitores me përçarjen e maqedonëve, Arben Taravari, Albin Kurti dhe 4 liderët e VLEN nuk duhet ta harrojnë kurrë konfliktin që kishte politika maqedone dhe u bënë bashkë në luftën e vitit 2001 kundër shqiptarëve!
Po, ata u bënë bashkë edhe në konfliktin që kishin me Serbinë, por, jo për të luftuar, por për të heshtur ndonëse Serbia ose më saktë lideri i radikalëve të Vuçiçit, krimineli Vojislav Sheshel, në vitin 1990 përbuzi godinën ku thuhet se janë ngritur themelet e shtetit maqedon, Manastirin Prohor Pçinjski, aty ku në vitin 1944 u mbajt Kuvendi antifashist i çlirimit popullor të Maqedonisë! Madje, ishin po këta maqedonë kur në vitin 2023 e konsideruan fitore, një lojë shahu në Ditën e Shtetësisë, të Presidentit Pendarvoski me Vuçiçin në këtë manastir në Serbi, edhe pse vetëm një vit më parë Presidenti serb Vuçiç nuk e priti fare! Pa përmend këtu faktin se vendi ku u mbajt ky Kuvend, murgjit e shndërruan në restorant manastiri!
Në fund, nëse politika shqiptare në Maqedoni të Veriut mendon vërtetë që një ditë të zgjedh një shqiptar për President, pas 23 vjet bashkëjetese me maqedonët është mirë të kërkojnë zgjedhjen e presidentit nga Parlamenti, që është dhe mënyra e vetme për të zgjedhur një President shqiptar të Maqedonisë së Veriut; Jo për të zgjedhur një President si Boris Trajkovski që luftoi me shqiptarët, por, për të zgjedhur një President që respekton institucionet e Maqedonisë Veriut pavarësisht nëse drejtohen nga shqiptarët ose maqedonët.
Deri më sot shqiptarët i qëndruan besnik këtij shteti sipas Marrëveshjes së Ohrit, tani topi është në fushën maqedone…
