Mashtrimi që çon në kolaps, Dr.Bardh Spahia: Ja si del gënjeshtra!

Nga mesazhet e pafundme që i mbërrijnë, fatkeqësisht Ish-Deputeti i PD, Dr.Bardh Spahia, konstaton se vazhdon saga e familjarëve që presin me orë informacion mbi të afërmit e tyrë të shtruar në dy spitalet Covid në Tiranë!

“Sa e vështirë është të përcaktohen orare për dhënie informacioni në mënyrë që edhe familjarët të qetësohen, edhe personeli të mos stresohet, duke u kapur për mënge sa herë që lëviz jashtë spitalit?” thekson Dr.Bardh Spahia duke shtuar se sikur Ministrja e Shëndetësisë, Ogerta Manastirliu, të kishte mbajtur premtimin e hapjes së spitalit Covid3, për të pritur rastet në fazë shërimi, për të ulur ngarkesën e dy spitaleve që trajtojnë të infektuarit, do kishte qenë një lehtësim për të gjithë, edhe familjarët.

“Më 25 Prill, ministrja Manastirliu e premtoi këtë për spitalin Covid 3, duke thënë me zë e figurë, e pasqyruar edhe në faqen zyrtare, se “Është një strukturë e cila është e mjaftueshme përsa i përket pacientëve të cilët janë në fazë shërimi dhe duhet vetëm të bëjnë periudhën e kovalishencës, ku do të shërbejë ish-klinika një dhe më pas edhe dy klinikat e tjera të cilat po bëhen gati për të pritur rastet, nëse do të kemi një fluks të të sëmurëve me Covid-19,” thekson Ish-Deputeti i PD në reagimin e tij përmes rrjetit social Facebook duke sjell dëshmi dhe pas denoncimeve të opozitës, më 6 Gusht, Manastirliu harron çfarë ka premtuar:

“Dhe na del me variatin, se paskërka një plan me logjikë. “…siç e parashikon plani ynë – dhe siç e kërkon logjika – Covid-3 dhe më pas Covid-4, do të hapen pasi të jenë ezauruar shtretërit në Covid-1 dhe Covid-2. Kjo është edhe përgjigja ndaj shqetësimit të ngritur nga Partia Demokratike, se “ende në Covid-3 nuk është trajtuar asnjë pacient me Covid”.

Ja pra që nuk ka asnjë strategji, por deklaratat bëhen sa për t’i hedhur sy shqiptarëve, konstaton Ish-Deputeti i Partisë Demokratike, Dr.Bardh Spahia duke përfunduar:

“Po të kishte një plan veprimi konkret, ai do zbatohej, e nuk do harrohej rrugës, mes përgatitjes së videove për mashtrime të tjera!”