Mbetjet e fasonerisë si lëndë djegëse në furrat e gëlqeres, arrestohen 9 persona…
Arrestohen 9 persona në Krujë, të cilët në mënyrë të përsëritur, gjatë prodhimit të gëlqeres përdornin si material djegës materiale të ndryshme plastike, sintetike, mbetje fasonerie dhe goma automjetesh.
Kjo mënyrë e djegies ishte bërë shqetësim i madh dhe ishte denoncuar nga banorët e zonës se po rrezikonte shëndetin dhe jetën e tyre, dhe po shkaktohej një dëm i madh në ambient, por policia ka arritur vetëm sot të sekuestroj një kamion të ngarkuar me mbetje fasonerie.
Njoftimi i policisë:
Shërbimet e Komisariatit të Policise Krujë, pas informacioneve të siguruara nga Strukturat Policore, si dhe nisur nga shqetësimet e banorëve të cilët ndiheshin të rrezikuar nga ndotja e ajrit pasi disa shtetas në mënyrë të përsëritur në Krastë digjnin furra për prodhimin e gëlqeres, duke përdorur si material djegës mbetje të ndryshme lëkure të fasonerive, goma të përdorura automjetesh dhe materiale të ndryshme plastike dhe sintetike, mbrëmjen e djeshme kanë organizuar punën duke ushtruar kontroll të befasishëm në Krastë .
Si rezultat nga Policia e Krujës janë arrestuar në flagrancë shtetasit:
• L.A, 38 vjeç, banues në Krujë;
• M. Sh,37 vjeç, banues në Krujë;
• A.S, 43 vjeç, banues në Krujë;
• I.S, 34 vjeç, banues në Krujë;
• B.S, 64 vjeç, banues në Krujë;
• L.K, 61 vjeç, banues në Krujë;
• F.Sh, 47 vjeç, banues në Krujë;
• I.B, 48 vjeç, banues në Krujë;
• D.I, 49 vjeç, banues në Krujë.
Në cilësinë e provës materiale është sekuestruar një mjet kamion tip Mercedez Benz i ngarkuar me mbetje fasonerie dhe plastike të rrezikshme që do të përdoreshin për djegie në këto furra në pronësi të shtetasit I.B.
Materialet i kaluan Prokurorisë së Rrethit Gjyqësor Krujë për veprime të mëtejshme për veprën penale “Ndotja e ajrit”në bashkëpunim, mbetur në tentativë parashikuar në nenin 201, 25, 22 të Kodit Penal.
Policia e Krujës falenderon qytetarët për bashkëpunimin dhe i fton të denoncojnë çdo shkelje të ligjit duke ju garantuar reagim të shpejtë dhe të paanshëm.
